ՀՀ ՊՆ-ն դարձել է երկրորդ խոշորագույն հարկատուն․ առաջատար տասնյակը փոփոխվել է

ՊԵԿ-ը հրապարակել է 2021 թվականի առաջին եռամսյակի արդյունքներով խոշորագույն 1000 հարկատուների ցանկը։ Դրա մեջ այս անգամ ներառվել են նաև պետական կառույցները, ինչի արդյունքում Պաշտպանության նախարարությունը դարձել է Հայաստանի երկրորդ խոշորագույն հարկատուն։

Նախարարությունը երեք ամսում վճարել է ավելի քան 15 մլրդ դրամ հարկ։ Դրա մեծ մասը՝ շուրջ 12,8 միլիարդ դրամը, եկամտահարկն է, որը գանձվում է աշխատավարձերից և նման այլ վճարներից։ Եվս շուրջ 2 մլրդ դրամ նախարարությունը վճարել է ավելացված արժեքի հարկի գծով։

Առաջին խոշորագույն հարկատուն, ինչպես և նախորդ տարվա նույն ժամանակահատվածում, «Գազպրոմ Արմենիա» ընկերությունն է։ Այն ընդհանուր առմամբ վճարել է 18,7 մլրդ դրամ հարկ՝ առաջին երեք ամսվա ընթացքում։

Նախորդ տարվա նույն ժամանակահատվածում ցանկում երկրորդն էր «Գրանդ Տոբակոն», որն այս տարվա առաջին եռամսյակի արդյունքներով գրեթե 5 անգամ կրճատել է վճարած հարկերը և հայտնվել է 7-րդ տեղում։

Այս տարի երկրորդ տեղը գրաված Պաշտպանության նախարարությանը հետևում է Զանգեզուրի պղնձամոլիբդենային կոմբինատը, որ նույնպես ավանդաբար առաջատարների թվում է։ Այս ընկերությունը վճարել է ընդհանուր 9,8 մլրդ դրամ հարկ։

Հաջորդ հորիզոնականները զբաղեցնող ընկերությունների և կառույցների վճարած հարկերի չափերը զգալիորեն զիջում են առաջատարների վճարած հարկերին։ Այսպես, չորրորդ հորիզոնականում գտնվող «Ինտերնեյշնլ Մասիս Տաբակ» ընկերությունը, որ մշտապես առաջատարների թվում է, վճարել է շուրջ 4,1 մլրդ դրամ, ինչը ավելի քիչ է երրորդ հորիզոնականը զբաղեցնող հարկատուի ցուցանիշից։

Առաջատար հնգյակը եզրափակում է «Գեոպրոմայնինգ Գոլդ» ընկերությունը, որը նույնպես մշտական առաջատարներից է։ Այս ընկերությունը շահագործում է Սոթքի հանքը, որը պատերազմից հետո վտանգված է, քանի որ հանքավայրի մի մասը խորհրդային սահմանների միջոցով արված բաժանման հետևանքով մնացել է ադրբեջանական կողմին հանձնված Քարվաճառի շրջանում։

Ընդհանուր առմամբ պետք է նշել, որ խոշորագույն հարկատուների ցանկում զգալի խզվածք կա, քանի որ առաջին 20 հորիզոնականները զբաղեցնող կառույցները և ընկերությունները միասին ապահովել են այս 1000 հարկատուների վճարած հարկերի շուրջ ⅓-ը կամ 85,2 միլիարդը՝ 260,2 միլիարդից։