Սայլակների փոխարեն՝ հավաստագրեր. բարեփոխո՞ւմ, թե՞ հաշմանդամներից գումար կորզելու նոր ձև

Անվասայլակներից օգտվող հաշմանդամություն ունեցող անձինք այսուհետ ոչ թե սայլակներ կստանան, այլ հավաստագրեր։ ՀՀ աշխատանքի և սոցիալական հարցերի նախարարության հաշմանդամների և տարեցների հիմնահարցերի վարչության պետ Արթուր Կեսոյանը լրագրողներին ներկայացնելով այս փոփոխությունը, նշեց, որ այն կատարվում է հաշմանդամություն ունեցողների օգին։ Մինչդեռ հաշմանդամություն ունեցող անձինք այս փոփոխությանից դժգոհ են։ Նրանք նշում են, որ հավասատագրով նախատեսված գումարը չի բավարարում, որպեսզի գնեն այն սայլակը, որն իրենց է անհրաժեշտ։ Իսկ հարմարավետ անվասայլակի համար պետք է հավելյալ գումար վճարեն սեփական միջոցներից։

Բողոքները, սակայն, վերաբերում են ոչ միայն անվասայլակներին, այլև պրոթեզային սարքավորումներին։ Այսօր Կառավարության շենքի դիմաց բողոքի ակցիա անցկացնող հաշմանդամություն ունեցող մի խումբ քաղաքացիներ պնդում էին, որ կատարվելիք փոփոխությունների արդյունքում գերմանական արտադրության պրոթեզների փոխարեն իրենց են տալու չինական արտադրության սարքավորումներ։

ՀՀ աշխատանքի և սոցիալական հարցերի նախարարության հաշմանդամների և տարեցների հիմնահարցերի վարչության պետ Արթուր Կեսոյանը, սակայն, հավաստիացրեց, որ անորակ սարքավորումների մասին խոսք լինել չի կարող: Պաշտոնյայի խոսքով՝ իրենք պրոթեզային սարքավորումներ ձեռք բերելու համար մրցույթ են հայտարարել և մասնակից ընկերությունները պետք է համապատասխանեն միջազգային ստանդարտներին: Մանրամասները՝ տեսանյութում։

Լիլիթ Շաբոյան