Հասարակություն
01.02.2021 | 15:38Մեր կրթության և գիտության վիճակն այսօր պատրաստ չէ աշխարհում առկա մարտահրավերներին դիմակայելուն, այդ թվում՝ տարածաշրջանային, բայց նախադրյալներ կան, երբեք հիասթափվել պետք չէ: Այս մասին խորհրդարանում լրագրողների հետ ճեպազրույցում նշեց Բարձրագույն որակավորման կոմիտեի նախկին նախագահ Սմբատ Գոգյանը:
«Երբ Արայիկ Հարությունյանը դուրս եկավ իր պաշտոնից, ես հարցազրույց տվեցի և այն ժամանակ ասեցի, որ փոփոխությունը տեղին չէ, մեր երկրի մարտահրավերների մեջ չի մտնում ԿԳՄՍ նախարարին փոխելը: Մենք ունենք շատ ավելի խոր խնդիրները»,- նշեց Գոգյանը՝ հավելելով, որ, ցավոք, հստակ ձևակերպում չկա, թե ինչ ենք ակնկալում կրթության ոլորտից:
Գոգյանի խոսքով՝ առաջնահերթ պետք է փոխվի բնակչության վերաբերմունքը մեր երկրի նկատմամբ, քանի դեռ դա տեղի չի ունեցել, կրթության նկատմամբ էլ վերաբերմունքը չի փոխվի:
«Գիտությունը երկարատև և ծանր պրոցես պետք է լինի, որ արդյունք ունենա: Եթե մենք 2000-ականներին այսպիսի քննարկում ունենայինք և ճիշտ ուղղությամբ գնայինք, ապա հիմա անվտանգություն կունենայինք: Գիտություն զարգացնելու համար առնվազն տասնամյակի պլան պետք է լինի»,- հավելեց Գոգյանը:
Դիտարկմանը, որ գիտնականները պահանջում են վարչապետ Նիկոլ Փաշինյանի հրաժարականը, Սմբատ Գոգյանը պատասխանեց. «Գիտնականներ կլինեն, որոնք պահանջում են, բայց չեմ կածում, որ դա ամբողջ գիտական հանրույթի պահանջն է: Գիտական հանրույթը շատ լավ հասկանում է, որ Նիկոլ Փաշինյանի լինել-չլինելը գիտության խնդիրները ֆունդամենտալ առումով չի լուծի: Կարող ենք ստորագրահավաք անել, թե որ գիտնականները չեն պահանջում, բայց եկեք պառակտում չանենք»:
Հարցին՝ հնարավո՞ր է առաջիկայում իշխանության հետ համագործակցի, Գոգյանը պատասխանեց. «Ես իմ իդեաներն ունեմ և միայնակ ավելի շատ բան կարող եմ անել, քան կառավարության ներսում: Բայց եթե կառավարությունը կունենա հստակ ծրագրեր և նպատակներ, կարող եմ համագործակցել ցանկացած իշխանության հետ»:
Մանրամասները՝ տեսանյութում:
