Սյունիքի նախկին մարզպետ Վահե Հակոբյանի հարցաքննությունն ավարտվել է

Սյունիքի նախկին մարզպետ Վահե Հակոբյանի հարցաքննությունը Քննչական կոմիտեում ավարտվել է։ Այս մասին հայտնում են նրա փաստաբանական թիմից․

«Վերջինս հարցաքննվել է վկայի դատավարական կարգավիճակով, սակայն ընդհանուր առմամբ վարույթն իրականացնող մարմնի կողմից տրված հարցերը կրել են մերկացնող բնույթ, որոնց, ի դեպ, տրվել են սպառիչ պատասխաններ։ Հարցաքննության ամենասկզբից տեղեկացանք, որ քրեական գործը հարուցվել է դեռ 2020 թվականի մարտի 29-ին, այսինքն՝ պ-ն Հակոբյանին հարցաքննությանը հրավիրելուց 11 ամիս առաջ։ Մեր կողմից, բնականաբար, գրավոր հայտարարություն արվեց այն մասին, որ այս գործընթացը կրում է բացառապես քաղաքական բնույթ, քանի որ քրեական գործի հարուցումից միայն 11 ամիս անց պ-ն Հակոբյանին հարցաքննությանը հրավիրելը, այն էլ վերջինիս կողմից քաղաքական ակտիվություն ցուցաբերելուց հետո ,ոչ այլ ինչ է, եթե ոչ քաղաքական հետապնդում»,- ասված է հայտարարության մեջ։

Հիշեցնենք, որ քրեական գործ է հարուցվել ՀՀ քրեական օրենսգրքի 179-րդ հոդվածի (յուրացնելը կամ վատնելը) 2-րդ մասի 1-ին կետով, 314-րդ հոդվածի (պաշտոնեական կեղծիքը) 1-ին մասով:

Հակոբյանի փաստաբանները նշում են, թե նախաքննության գաղտնիքով պայմանավորված, չեն կարող հարցաքննությունից շատ տեղեկություններ հայտնել․ «Խոսքը գնում էր Հակոբյանի կողմից 4 աշխատանքային օր իբրև աշխատանքի չներկայանալու մասին։ Կրկնում ենք ՝ 4 աշխատանքային օր: Տվյալ հանգամանքի կապակցությամբ նույնպես տրվել է սպառիչ պարզաբանում, ինչպես նաև իրավական հարթությունում հիմնավորել ենք, որ տվյալ պայմաններում որևէ հանցագործության և հատկապես յուրացմամ և վատման հանցակազմի մասին խոսք չի կարող գնալ»։