06.08.2026 | 19:57
Թուրքիայի պատգամավորները հավանություն են տվել PKK-ի զինյալների սահմանափակ համաներման մասին օրինագծին
Ազատանցիները ճանապարհ են փակել․ շրջափակման կամ գերության մեջ է համայնքից 6 զինծառայող
16.12.2020 | 15:34
Այսօր առավոտյան շրջափակման մեջ հայտնված ու անհայտ դրության մեջ գտնվող զինծառայողների հարազատները Շիրակի մարզում տարբեր ավտոճանապարհներ են փակել՝ իրենց զինվորների մասին տեղեկություններ պահանջելով։ Փակվել է նաև Գյումրի-Երևան ավտոճանապարհի՝ Ազատանի հատվածը։
Ազատան համայնքի ղեկավար Վարդան Իկիլիկյանը Factor.am-ի հետ զրույցում ասաց՝ ՄՈԲ ռեսուրսով 6 զինծառայող է գնացել, Խծաբերդ, Հին թաղեր գյուղերում են եղել, իսկ հիմա նրանցից լուր չունեն։
«Համացանցում երկուսի նկարները գցել են, որ թուրքերի մոտ գերեվարված են։ Երեք օր եղավ՝ լուր չունենք։ Չեն զանգում, չենք կարողանում խոսել, կապվել հետները»,- ասաց Վարդան Իկլիկյանը։
Նա նշեց, որ զինծառայողները գնացել են 20-25 օր առաջ, 4-5 օր առաջ էլ պիտի հերթափոխված լինեին։
Համայնքի ղեկավարը նաև տեղեկացրեց, որ Երևանում է՝ ԱԺ-ում հանդիպումներ է անցկացնում զինծառայողների հարցով։ Նրանց ծնողներն էլ Արցախում են․ հանդիպել են նախագահ Արայիկ Հարությունյանի և Պաշտպանության բանակի ու այլ կառույցների ներկայացուցիչների հետ։
Հիշեցնենք, որ այսօր մի խումբ գյուղացիներ փակել են Շիրակի մարզի Քեթի գյուղ տանող ճանապարհը։ Նրանք հայտարարում են, որ ադրբեջանական կողմի տարածած տեսանյութերում տեսել են իրենց հարազատներին՝ գերության մեջ։
Էմմա Չոբանյան
