Հայկ Սարգսյանի հայտարարագրի և Արսեն Թորոսյանի գնումների վերաբերյալ կոռուպցիայի կանխարգելման հանձնաժողովի ուսումնասիրությունների հրապարակման օրերը հայտնի են

Կոռուպցիայի կանխարգելման հանձնաժողովը դեկտեմբերի 1-2-ին կհրապարակի Առողջապահության նախարար, իշխող «Քաղաքացիական պայմանագիր» կուսակցության վարչության անդամ Արսեն Թորոսյանի նկատմամբ հարուցված վարույթի եզրակացությունը: Այս մասին Factor.am-ի հարցին ի պատասխան ասաց Կոռուպցիայի կանխարգելման հանձնաժողովի նախագահ Հայկուհի Հարությունյանը: Հիշեցնենք՝ հանձնաժողովը հուլիսի 31-ին իրավիճակային շահերի բախման առերևույթ դեպքի հիմքով վարույթ էր հարուցել ՀՀ առողջապահության նախարար Արսեն Թորոսյանի նկատմամբ։ Դրա համար հիմք է հանդիսացել այն, որ առողջապահության նախարարությունը ծառայությունների մատուցման հինգ պայմանագրեր էր կնքել «Միբս» ընկերության հետ՝ 124 մլն դրամի շրջանակներում: Այս ընկերության տնօրենը նախարար Արսեն Թորոսյանի կինն է՝ Վարդանուշ Թևանյանը, իսկ մինչ նախարար նշանակվելը հենց Արսեն Թորոսյանն էր զբաղեցնում ընկերության տնօրենի պաշտոնը:

Հանձնաժողովի ուշադրության կենտրոնում է նաեւ իշխանության մեկ այլ ներկայացուցչի՝ ԱԺ «Իմ քայլը» խմբակցության պատգամավոր Հայկ Սարգսյանի գույքն ու եկամուտը: Հայկ Սարգսյանի եկամուտների հայտարարագրի, հնարավոր անհամատեղելիության և այլ սահմանափակումների վերաբերյալ ուսումնասիրություն հանձնաժողովը սկսել էր մամուլի հրապարակումներից հետո, որոնցից պարզ էր դրաձել, որ Հայկ Սարգսյանի ընկերը ապօրինի շահագործում է «Սպիտակ Շորժա» հանգստի գոտին: «Հաշվի առնելով այն հանգամանքը, որ հայտարարագրում ներկայացրած տվյալների հավաստիության ստուգումը ենթադրում է նաև պետական կառավարման, տեղական ինքնակառավարման մարմիններից, այլ անձանցից տեղեկությունների հավաքում, հանձնաժողովն ուսումնասիրության մասին կտեղեկացնի լրացուցիչ` ստացված տվյալների համադրման և ամփոփման հիման վրա»,- հայտարարել էին հանձնաժողովից: Հիշեցնենք, որ լողափի ապօրինի շահագործման մասին մամուլի հրապարակումները եղել են հուլիսի վերջին, ասել է թե՝ անցել է արդեն գրեթե 4 ամիս։

Factor.am-ը Հայկուհի Հարությունյանից հետաքրքրվեց, թե ինչ է արվել այս ընթացքում և ուսումնասիրությունը որ փուլում է։ Հարությունյանը տեղեկացրեց, որ հանձնաժողովը պատգամավորին հարցադրումներ է ուղարկել, սպասում են պատասխանին: Ըստ Հարությունյանի՝ Հայկ Սարգսյանին հարցերին պատասխանելու համար երկու շաբաթ ժամանակ է տրվել, որն ավարտվում է այս շաբաթվա վերջին: Եթե պատգամավորի պատասխանները չփարատեն հանձնաժողովի կասկածները, ապա կրկին վարույթ կհարուցվի:

Հայկուհի Հարությունյանը, մեր ճշտող հարցին ի պատասխան, ասաց, որ այս պահին խնդիրներ են հայտնաբերել 10-ից ավելի պատգամավորների եկամտի եւ գույքի հայտարարագրերում, վերջիններիս կրկին հարցեր են ուղարկել, եթե բացատրությունները հանձնաժողովին չբավարարեն, կրկին վարույթներ կհարուցվեն: Հայկուհի Հարությունյանն ասաց, որ այս շրջանում պատգամավորների անունները դեռ հրապարակման ենթակա չեն:

Ի դեպ, կոռուպցիայի կանխարգելման հանձնաժողովն այս տարվա հուլիսին աշխատանքի եւ սոցիալական հարցերի նախկին նախարար Զարուհի Բաթոյանի նկատմամբ կիրառել էր վարչական տույժ՝ նշանակելով տուգանք 200.000 ՀՀ դրամի չափով: Բանն այն էր, որ Բաթոյանը հայտարարագրում չէր ներկայացրել 2018-ին ստացած 7 մլն դրամ եկամուտը:

Հավելենք, որ հանձնաձողովի ուսումնասիրությունների եւ եզրակացության արդյունքում ԱԺ խորհուրդն այսօր նիստ է հրավիրել՝ ԲՀԿ ղեկավար, պատգամավոր Գագիկ Ծառուկյանին մանդատից զրկելու հարցով ՍԴ դիմելու համար: Ըստ հանձնաժողովի, Ծառուկյանը պատգամավորական գործունեությանը զուգահեռ իրեն պատկանող եւ հավատարմագրային կառավարման հանձնված մի շարք ընկերություններում որոշումներ է կայացրել: ԲՀԿ խմբակցությունից Նաիրա Զոհրաբյանը Factor.am-ին հաստատեց ԱԺ խորհրդի կազմում ԲՀԿ-ականների ներկայությունը, սակայն, նշեց, որ Գագիկ Ծառուկյանը չի ներկայանալու:

Նարեկ Կիրակոսյան