22.02.2026 | 16:38
Ուկրաինայի ուղղությամբ արձակվել է գրեթե 300 հարվածային դրոն․ Զելենսկի
Վանեցյանին Գլխավոր դատախազությունից առաջարկում են հանցագործության մասին հաղորդում ներկայացնել
Հասարակություն
23.11.2020 | 18:54
ՀՀ գլխավոր դատախազությունից Factor.am-ի հարցին, թե արդյոք ուսումնասիրում են ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանի՝ նոյեմբերի 21-ին արած հայտարարությունը՝ Փաշինյանի կողմից անտառահատներին «սատկացնելու» հրահանգի մասին, փոխանցեցին, որ նա կարող է հանցագործության մասին հաղորդում ներկայացնել:
«Հայտարարությունն արվել է իրավապահ մարմնի նախկին ղեկավարի կողմից, որը շատ լավ գիտի, թե ինչպիսին է իրավական ընթացակարգը հնարավոր հանցավոր դրսևորումների առնչվելիս կամ դրանց վերաբերյալ տեղեկանալիս: Դրա միակ միջոցը իրավապահ մարմիններին դիմելն է: Եթե մինչև հիմա դա չի արվել, ապա այսօր էլ ոչինչ չի խանգարում հայտարարության հեղինակին իրավապահ մարմիններին ներկայացնել հաղորդում»,- փոխանցեցին գլխավոր դատախազությունից:
Հիշեցնենք՝ նոյեմբերի 21-ին, Ազատության հրապարակում վարչապետի հրաժարականի պահանջով հանրահավաքի ժամանակ, Արթուր Վանեցյանն անդրադարձել էր վերջին օրերին բողոքի ակցիաներ իրականացնողների նկատմամբ ոստիկանական ուժի կիրառմանը և հայտնել, որ 2019-ի ամռանը Իջևանում անտառահատների բողոքի ցույցերի ընթացքում Փաշինյանը զանգահարել է իրեն ու այդ ժամանակվա ոստիկանապետ Վալերի Օսիպյանին և ասել՝ «ուզում եմ արյան գետեր տեսնել, սատկացրեք բոլորին»:
Հանրահավաքի ավարտից հետո լրագրողների հետ զրույցում այն հարցին, թե արդյոք Վանեցյանն ապացույցներ ունի Փաշինյանի հրահանգի վերաբերյալ, ընդդիմադիր գործիչն արձագանքել է, որ իր ասածները իշխանությունը չի կարող ժխտել՝ պնդելով, որ իր և Օսիպյանի խոսքն ապացույց է։
Նարեկ Կիրակոսյան
