Հայաստանում բնակվող արցախցիները հիմա Արցախում մնալու տեղ չեն ունենա․ բնակֆոնդի մի մասն ավերված է. ՏԵՍԱՆՅՈՒԹ

Արցախում 44 օր տևած պատերազմի առաջին իսկ օրից թիրախում քաղաքացիական ենթակառուցվածքներն էին ու խաղաղ բնակիչները՝ Ստեփանակերտում, Շուշիում, Հադրութում, Մարտունիում, Մարտակերտում և այլ քաղաքներում։

Քաղաքացիական ենթակառուցվածքները հրետակոծելու համար գործի էին դրվում ծանր հրետանի, կասետային հրթիռներ, Գրադ և Սմերչ կայանքներ, կիրառվում էր ռազմական ավիացիա։ Կիրառված զենքի ու ավերածությունների մասին Factor TV-ին մանրամասներ է ներկայացրել Արցախի արտակարգ իրավիճակների պետական ծառայության տեղեկատվության բաժնի ղեկավար Հունան Թադևոսյանը։

«Բնակելի թաղամասերից բացի՝ թշնամական կողմը թիրախավորել էր նաև կոմունիկացիոն համակարգերը, այդ թվում՝ հացի արտադրամասերը, էլեկտրամատակարարման, ջրամատակարարման համակարգերը, գազամատակարարման խողովակները։ Տվյալ ընկերությունները համապատասխան աշխատանքներ են տարել, որ Ստեփանակերտն ունենա մշտական ջուր, լինի մշտական լույս գոնե։ Կարողացել են, թեկուզ ժամանակավորապես, վերականգնել։ այս պահին էլ վերականգնման աշխատանքները շարունակվում են։ Այս պահին Ստեփանակերտում գազ չկա, բայց կան թաղամասեր, որտեղ վերականգնվում է լույսը»,- նշեց Թադևոսյանը։

Հումանիտար ճգնաժամ առաջացնելուն միտված թշնամու թիրախում էր նաև մարդասիրական առաքելություն իրականացնող արտակարգ իրավիճակների պետական ծառայության շենքը՝ պատերազմի 5-րդ օրը՝ հոկտեմբերի 2-ին։

Պատերազմական այս օրերին փրկարար ծառայողների շրջանում կա 4 զոհ և 15 վիրավոր։ Հիմա քաղաքում ձայներ չկան՝ հրթիռները լռել են, գործի են անցել սակրավորները։

Թե 44 օրերի վնասները թվային ի՞նչ պատկեր ունեն՝ Թադևոսյանն ասաց՝ դեռ վաղ է ասել․ գույքագրման ու չափագրման աշխատանքներն ընթացքի մեջ են։ Իսկ ե՞րբ կսկսվեն վերականգնման աշխատանքները հարցին ի պատասխան՝ նա նշում է՝ դրանք արվել են անգամ պատերազմական օրերին։

ԱԻՊԾ պաշտոնյան նշում է՝ անգամ այս պահին վերադարձողներ կան։ Ասում է՝ վերադառնալ, թե ոչ հարցով զանգեր 911 ծառայությունն այսօր ամենաշատն է ստացել։

Իսկ արդյո՞ք Շուշիի բնակիչը կարող է գնալ քաղաք՝ գոնե իր իրերի հետևից հարցին Հունան Թադևոսյանը պատասխանեց՝ այդ հարցով ևս զանգերը շատ են, բայց ընթացակարգից իրենք տեղյակ չեն։

Մանրամասները՝ տեսանյութում։

Իրինա Մկրտչյան