06.12.2025 | 22:41
Պետք է շարունակենք մեր ծառայությունը բերել մեր ժողովրդին. Գարեգին Բ-ն` Փաշինյանի քայլերի մասին. ՏԵՍԱՆՅՈՒԹ
Օրենքն ընդունվել է առանց կեղծիքի. Էդուարդ Շարմազանով
Քաղաքականություն
20.12.2017 | 13:03
ԱԺ փոխնախագահ Էդուարդ Շարմազանովը պնդում է՝ Ազգային ժողովում «Հայաստանի Հանրապետության դատական օրենսգրքում փոփոխություններ կատարելու մասին» օրենքի նախագծի քվեարկության ժամանակ կեղծիք չի եղել:
«Օրենքն ընդունվել է «Ազգային ժողովի կանոնակարգ» օրենքի համաձայն ու առանց որևէ կեղծիքի»,- խորհրդարանում լրագրողների հետ զրույցում հայտարարեց ԱԺ փոխնախագահը: Շարմազանովը նշեց, որ քվեարկության ընթացքում «Ծառուկյան» խմբակցության որևէ պատգամավոր ձայն չի խնդրել և չի ասել, որ ինքը սխալ է քվեարկել:
«Հետևությունը հետևյալն է՝ քվեարկությունը եղել է օրինական, որովհետև եղել է 62 ձայն, իսկ վարման կարգի վերաբերյալ որևէ մեկը չի հայտարարել, թե Նապոլեոն Ազիզյանը չի քվեարկել։ Կա օրենք՝ եթե դու քո քվեարկության հետ ունես խնդիր, ձեռք ես բարձրացնում ու վարման կարգով խոսում։ «Ծառուկյան» խմբակցության որևէ պատգամավոր վարման կարգով ձայն չի խնդրել»,- հավելեց Շարմազանովը։
Factor.am-ի հարցին՝ ինչո՞ւ չկրկնեցին քվեարկությունը, եթե խնդիր չկար, Շարմազանովը պատասխանեց՝ կրկնելու կարիք չկար:
Հիշեցնենք՝ «Հայաստանի Հանրապետության դատական օրենսգրքում փոփոխություններ կատարելու մասին» օրենքի նախագծի քվեարկության ընթացքում ընդդիմադիր երկու ուժերը բոյկոտեցին քվեարկությունը՝ լքելով դահլիճը ու պնդելով, որ ապօրինի քվեարկություն է տեղի ունեցել:
Մանրամասները՝ տեսանյութում:
Շողիկ Գալստյան
