18.11.2024 | 15:42
Շինարարությունը, տրանսպորտն ու բաց հանքերն են օդի հիմնական աղտոտողները. քաղաքապետարանի ներկայացուցիչ․ ՏԵՍԱՆՅՈՒԹ
Ալիևը «վաբանկ» է գնացել, առաջին խոշոր պարտությունը նրա համար ճակատագրական կլինի․ Տաթևիկ Հայրապետյան. ՏԵՍԱՆՅՈՒԹ
Քաղաքականություն
29.09.2020 | 12:26
Ադրբեջանը հարձակվել է նաև Հայաստանի Հանրապետության տարածքի վրա։ Նախ ադրբեջանական բանակը նոր սադրանք է իրականացրել՝ հող նախապատրաստելով դրա համար, ապա ժամեր անց սկսել է հարձակումը։ Պատերազմի ընթացքի մասին Factor TV-ի եթերում խոսել ենք ադրբեջանագետ, ԱԺ պատգամավոր Տաթևիկ Հայրապետյանի հետ։
– Ադրբեջանը նախ հայտարարեց, թե հայկական կողմը կրակել է Դաշքեսանի ուղղությամբ, հետո նաև սկսեց բուն հարձակումը։ Ադրբեջանը նախապե՞ս էր տրամադրվել այսպես, թե՞ ընթացքից որոշեց, որ կարելի է Հայաստանի վրա հարձակվել։ Եվ ի՞նչ է լինելու հիմա։
– Նախ թույլ տվեք ցավակցությունս և զորակցությունս հայտնել մեր բոլոր զոհվածների ընտանիքներին և հարազատներին։ Ինչ վերաբերում է հարցին, ապա կարծում եմ Ադրբեջանը իսկապես ռազմական գործողությունները, աշխարհագրությունը ընդլայնելու քաղաքականություն է որդեգրել։
Այո, եղավ նախնական սադրանք, և հետո եղավ հարձակում, արդեն հետագա գործընթացները ցույց կտան։ Բայց որ Ադրբեջանը ամբողջ իր ներուժը դրել է այս ռազմական գործողությունների մեջ, դա հստակ է, և փորձում է ևս մեկ ճակատ ավելացնել ռազմական գործողություններին։
Այստեղ նաև գումարվում է փաստացի Թուրքիայի գրեթե ամբողջովին մասնակցությունը այս գործընթացներին՝ դիվանագիտական ճակատում ․․․ Էրդողանի ելույթները ավելի շատ են, քան Ալիևի ելույթները։ Եվ, կարծես, այնպիսի տպավորություն է, որ Էրդողանն է ղեկավարում այս ռազմական գործողությունները։
Եվ այս պայմաններում միջազգային հանրության արձագանքը պետք է լինի է՛լ ավելի ուժեղ, է՛լ ավելի դատապարտող։ Արդեն նկատվում են հստակ էլեմենտներ, որտեղ դատապարտվում է Թուրքիայի ներկայացվածությունը, բայց դրանք պետք է ավելի ընդգծվեն և բոլոր հնարավոր միջոցներով պետք է զսպել Թուրքիայի հետագա ներգրավումը և նաև ադրբեջանական ագրեսիան։
– Ադրբեջանը, եթե չասենք ռազմական ռեսուրսներ, ապա դիվանագիտական ռեսուրսներ, ներքին քաղաքական ռեսուրսներ ունի՞ երկարատև պատերազմ մղելու համար։
– Մինչև Ալիևի առաջին խոշորագույն պարտությունը։ Ադրբեջանը ունի այդ քաղաքական պատմությունը։ Մութալիբով, Էլչիբեյ, Հեյդար Ալիև … մարդիկ, որ գնում էին կամ գալիս էին իշխանության՝ անհաջողություն կրելուց հետո։
Փաստացի Ալիևը «վաբանկ» է գնացել այս ռազմական գործողություններով։ Առաջին խոշորագույն պարտությունը և դրա վերաբերյալ ամբողջական տեղեկատվության հրապարակումը Ալիևի համար իսկապես ճակատագրական է լինելու։
– Ե՞րբ կավարտվի պատերազմը։ Եթե ոչ ժամկետի տեսանկյունից, ապա ի՞նչ պայմաններում կավարտվի։
– Անշնորհակալ գործ է կանխատեսում անելը։ Դժվարանում եմ ասել, մանավանդ, որ ռազմական գործողությունների աշխարհագրության ընդլայնման միտումներ են նկատվում։ Ես հույս ունեմ, որ մեզ կհաջողվի արագորեն այնպիսի ջախջախիչ հարվածներ հասցնել հակառակորդին՝ այս գրոհը հետ մղելով և հակահարձակման անցնելով, որ մենք կարճ ժամանակ հետո կստիպենք պարտված Ադրբեջանին ուղղակի գլուխը կախ զինադադար խնդրել մեզնից։
Մանրամասները՝ տեսանյութում։
Գարիկ Հարությունյան
