ԲՀԿ աշխատակազմի ղեկավարն ազատման դիմում է գրել

Գագիկ Ծառուկյանի ղեկավարած «Բարգավաճ Հայաստան» կուսակցության աշխատակազմի ղեկավար Ռուբեն Մանուկյանն աշխատանքից ազատվելու դիմում է գրել։ Տեղեկությունը Factor.am-ի հետ զրույցում հաստատեց ԲՀԿ֊ական պատգամավոր Գևորգ Պետրոսյանը։

Ըստ Պետրոսյանի՝ Մանուկյանը հեռանում է զբաղեցրած պաշտոնից, քանի որ լրացել է կենսաթոշակային տարիքը։ Պատգամավորը վստահեցրեց, որ Ռուբեն Մանուկյանը կուսակցությունից չի հեռանում։ Սակայն մամուլում առկա են հրապարակումներ, որ Մանուկյանը ԲՀԿ-ն լքում է՝ Գագիկ Ծառուկյանին տեղյակ չպահելով։

Հիշեցնենք՝ վերջերս ԲՀԿ կուսակցությունը և խմբակցությունը լքեց պատգամավոր Սերգեյ Բագրատյանը, ավելի վաղ խմբակցությունից հեռացել էր նաև Տիգրան Ուրիխանյանը։ Նրանք այժմ հանդես են գալիս որպես անկախ պատգամավորներ։

Ի դեպ, Սերգեյ Բագրատյանը հայտարարել է, որ գաղափարական հակասություններ ունի ԲՀԿ-ի հետ։ Գագիկ Ծառուկյանը և նրա ղեկավարած կուսակցությունն էլ հայտնվել են իրավապահների ուշադրության կենտրոնում։ Ծառուկյանին ԱԱԾ-ն մեղադրում է 90 մլն դրամ ընտրակաշառք բաժանելու համար։ Ծառուկյանը, որը զրկվել է անձեռնմխելիությունից, հայտարարում է, թե այս քրեական գործերը քաղաքական հետապնդման արդյունք են։

Ծառուկյանն ավելի վաղ պահանջել էր կառավարության հրաժարականը։ ԲՀԿ խմբակցության պատգամավոր Սերգեյ Բագրատյանի դուրս գալուց հետո Մանուկյանը, ըստ լուրերի, երկրորդն է, ով ազատման դիմում է գրել առանց Գագիկ Ծառուկյանին տեղեկացնելու ու նրա հետ հանդիպելու։