08.11.2024 | 23:14
Վթար Աշտարակի խճուղում․ կա տուժած
Ադրբեջանական կողմը սեփական բնակչությունը շրջապատել է հրետանային մարտկոցներով ՝ նրանց թիրախ դարձնելով. New York Times
Քաղաքականություն
14.07.2020 | 23:21
Հայաստանի և Ադրբեջանի զինված ուժերն այսօր կիրառել են ծանր հրետանային և անօդաչու թռչող սարքեր։ Երկու կողմում առնվազն 16 զոհ կա, այդ թվում ՝ ադրբեջանցի գեներալ։ Ամերիկյան հայտնի New York Times-ն անդրադարձել է, իր բնորոշմամբ, երկու երկրների միջև 2016թ-ից հետո ռազմական վատթարագույն բռնկմանը։
Պարբերականը գրում է․ «Հարավկովկասյան երկրների անկայուն սահմանի վրա փոխհրաձգությունները սկսվեցին կիրակի: Ադրբեջանը հայտարարեց, որ երեք օր տևող մարտերում կորցրել է 11 զինծառայող և մեկ քաղաքացի, իսկ Հայաստանը 4 զոհի մասին նշեց։
Հարավային Կովկասի հարևան պետությունները 1994-ի պատերազմի ավարտից ի վեր Լեռնային Ղարաբաղի հակամարտության մեջ են: Հայաստանի և Ադրբեջանի ուժերը հաճախակի են բախումներ ունենում: Ներկայիս փոխհրաձգությունները, կարծես, ռազմական գործողությունների ամենալուրջ բռնկումն են՝ 2016 թվականից ի վեր, երբ քառօրյա մարտերի ընթացքում բազմաթիվ զոհեր էին գրանցվել։
Վերջին ռազմական գործողությունները սկսեցին կիրակի օրը: Երկու երկրների պաշտոնյաները միմյանց էին մեղադրում մարտը սկսելու համար և նշում, որ պարբերական հրետակոծությունը շարունակվում է։
Ադրբեջանի ՊՆ-ն հայտնեց, որ զոհվել է 2 բարձրաստիճան սպա ՝ գեներալ-մայոր Փոլադ Հաշիմովը, գնդապետ Իլգար Միրզաևը, ինչպես նաև 5 այլ զինածառայող։ Հայ պաշտոնյաների պնդմամբ՝ ադրբեջանական անօդաչու թռչող սարքերը գրոհ են իրականացրել Տուվուշի մարզի Բերդ քաղաքի վրա ՝ թիրախավորելով քաղաքացիական ենթակառուցվածքները: ՀՀ ՊՆ խոսնակ Շուշան Ստեփանյանը հայտարարեց, որ հայկական կողմը խոցել է ադրբեջանական անօդաչու թռչող սարքերից մեկը։ Ըստ Ստեփանյանի՝ Ադրբեջանի ԶՈՒ-ն որպես պաշտպանիչ վահան օգտագործել է քաղաքացիներին՝ հրետանային զենքը տեղադրելով Թովուզի շրջանի Դոնդար Ղուշչու գյուղի մոտակայքում ՝ սահմանից մոտ 10 կմ (վեց մղոն) հեռավորության վրա:
«Ադրբեջանական կողմը սեփական բնակչությունը շրջապատել է հրետանային մարտկոցներով ՝ նրանց թիրախ դարձնելով, իսկ հետո բողոքել, թե հայկական ուժերը կրակել են այդ ուղղությամբ», – ֆեյսբուքում գրել է ՀՀ ՊՆ խոսնակը՝ կից տեղադրելով գյուղի շուրջ ադրբեջանական հրետանու լուսանկարները:
Ադրբեջանական զինուժը հերքել է ԱԹՕ-ի կիրառումը և իր հերթին պնդել, որ իր ուժերը գնդակոծել են հայկական անօդաչու թռչող սարք և անձնակազմի հետ միասին ոչնչացրել հայկական հրետանային համակարգ: Ռազմական գործողությունների շարունակվելուն զուգահեռ՝ Հայաստանն Ադրբեջանին մեղադրում էր նաև Հայաստանի կառավարության կայքերի վրա կիբերհարձակումներ կատարելու համար:
Երկուշաբթի ՀՀ վարչապետ Նիկոլ Փաշինյանը մեղադրեց Ադրբեջանին՝ բախումները հրահրելու համար և նախազգուշացրեց, որ «այն կրելու է անկանխատեսելի հետևանքների պատասխանատվությունը»։
Ադրբեջանի նախագահ Իլհամ Ալիևը դատապարտեց, իր որակմամբ, «Հայաստանի հերթական սադրանքը» և խոստացավ պաշտպանել Ադրբեջանի ազգային տարածքը: Թուրքիան, որն Ադրբեջանի հետ էթնիկ և մշակութային սերտ կապեր ունի, հակամարտության հարցում Բաքվին ամուր աջակցություն է հայտնել։ ԱՄՆ-ն և Ռուսաստանը, որոնք համանախագահում են ղարաբաղյան հակամարտության կարգավորման շուրջ բանակցություններ տանող ԵԱՀԿ Մինսկի խումբը, դատապարտել են բռնությունները և զսպվածության կոչ արել։
Երկուշաբթի Ռուսաստանի արտգործնախարար Սերգեյ Լավրովն առանձին հեռախոսազրույցներ է ունեցել Հայաստանի և Ադրբեջանի իր գործընկերների հետ ՝ անհապաղ հրադադարի կոչ անելով: Երեքշաբթի ՌԴ նախագահ Վլադիմիր Պուտինի մամուլի խոսնակ Դմիտրի Պեսկովը հայտարարել է, որ Մոսկվան «խորապես անհանգստացած է» մարտերով և պատրաստ է միջնորդի դեր ստանձնել: ՄԱԿ-ի գլխավոր քարտուղար Անտոնիո Գուտերեշը նույնպես անհանգստություն է հայտնել: Նրա խոսնակը հայտարարել է, որ կառույցի ղեկավարը «բոլոր ներգրավվածներին կոչ է անում անհապաղ դադարեցնել պայքարը, անհապաղ քայլեր ձեռնարկել՝ իրավիճակը մեղմելու համար և զերծ մնալ սադրիչ հռետորաբանությունից»:
