19.09.2026 | 16:03
Երթ դեպի Եռաբլուր. հարգանքի տուրք է մատուցվել սեպտեմբերի 19-ի զոհերի հիշատակին
ԱՄՆ քաղաքացիները, հավանաբար, չեն կարողանա մուտք գործել ԵՄ տարածք. Associated Press
Քաղաքականություն
30.06.2020 | 15:56
Այսօր Եվրամիությունը պատրաստվում է հայտարարել այն երկրների ցուցակը, որոնց քաղաքացիներին կթույլատրվի մուտք գործել 31 եվրոպական երկիր, սակայն ամերիկացիների մեծամասնությանը, ամենայն հավանականությամբ, կարգելվի մուտք գործել Եվրոպա ևս երկու շաբաթ՝ ԱՄՆ-ում կորոնավիրուսով վարակման դեպքերի աճով պայմանավորված: Այս մասին հայտնում է Associated Press գործակալությունը:
Ըստ հաշվարկների՝ տարեկան ավելի քան 15 միլիոն ամերիկացի մեկնում է Եվրոպա ճամփորդության:
Այդուհանդերձ, այսօր շատ մարդիկ ինչպես Եվրոպայում, այնպես էլ դրա սահմաններից դուրս, շարունակում են խուսափել ճամփորդելուց՝ հաշվի առնելով կորոնավիրուսի հետ կապված իրավիճակը, համավարակի անկանխատեսելիությունը և երկրորդ ալիքի հավանականությունը, ինչը կարող է ազդել թռիչքների և հյուրանոցների ամրագրումների վրա: Մարտին, երբ վարակը արագ տեմպերով տարածվեց աշխարհով մեկ, և երկրները սկսեցին փակել սահմանները, տասնյակ հազարավոր ճանապարհորդներ տուն վերադարձան մեծ դժվարությամբ:
Ակնկալվում է, որ ցուցակում կլինեն մոտ 15 երկրներ, որոնց վարակի ցուցանիշները համեմատելի են ԵՄ երկրների ցուցանիշների հետ:
Ցուցակը կթարմացվի 14 օրը մեկ: Նոր երկրներ կավելացվեն կամ դուրս կմնան ցանկից` կախված նրանից, թե որքանով են վերահսկում վարակի տարածումը:
ԱՄՆ-ում մեկ օրում կորոնավիրուսի դեպքերի թիվը զգալիորեն աճել է: Ըստ Ջոնս Հոփքինսի համալսարանի հրապարակած տվյալների՝ երկրում կա ավելի քան 2,6 միլիոն վարակակիր, իսկ մահերը թիվը հասել է 126,000-ի:
ԵՄ ցուցակը չի տարածվում դեպի Բրիտանիա ուղևորությունների վրա: Մեծ Բրիտանիան հունվարին դուրս եկավ Եվրամիության կազմից, և այժմ բոլոր երկիր մուտք գործողները, բացառությամբ բեռնատար մեքենաների վարորդների, պետք է 14 օր ինքնամեկուսանան: Այս պահանջը ներկայումս քննարկման փուլում է և, հավանաբար, առաջիկա շաբաթների ընթացքում կմեղմացվի:
