19.09.2026 | 16:03
Երթ դեպի Եռաբլուր. հարգանքի տուրք է մատուցվել սեպտեմբերի 19-ի զոհերի հիշատակին
Ֆրանսիայի ամենահին ԱԷԿ-ը դադարել է գործել․ սա Գերմանիայի և Շվեյցարիայի երկարամյա պահանջն էր
Քաղաքականություն
30.06.2020 | 15:06
Ֆրանսիայի ամենահին ատոմային էլեկտրակայանը դադարել է գործել։ Ֆրանսիական EDF էներգետիկ կոնցեռնը տեղեկացրել է, որ Էլզասում գտնվող Ֆեսենհայմ ԱԷԿ-ի երկրորդ և վերջին էներգաբլոկի սարքավորումներն անջատվել են երկուշաբթի ուշ երեկոյան, գրում է DW-ի ռուսական ծառայությունը։
Այսպիսով, Ֆրանսիայի իշխանություններն ընդառաջեցին ԱԷԿ-ի գործունեությունը դադարեցնելու՝ Գերմանիայի և Շվեյցարիայի երկարամյա պահանջներին։ Գերմանիայում, մասնավորապես, մատնանշում էին կայանի աշխատանքում հաճախակի խափանումները և Վերին Ռեյնում հնարավոր ստորգետնյա ցնցումների վտանգը։
Միջուկային ռեակտորի ապամոնտաժումը կսկսվի 2025 թվականին և, ամենայն հավանականությամբ, կտևի մինչև 2040 թվականը։
Ավելի վաղ պաշտոնական Փարիզը խոստացել էր առնվազն 446 մլն եվրո վճարել՝ որպես կայանի փակման փոխհատուցում, սակայն արհմիությունները դեմ էին արտահայտվում։ Նրանք, մասնավորապես, նշում էին, որ հարյուրավոր մարդիկ գործազուրկ կդառնան։ Գերմանիան և Ֆրանսիան, սակայն, փոխզիջումային տարբերակ են գտել․ տարածաշրջանում տեխնոպարկ կբացվի, որի համար 1 մլն եվրո է նախատեսվում։
Նախապես ծրագրվում էր ԱԷԿ-ի աշխատանքը դադարեցնել 2016 թվականի վերջին։ Այս ատոմակայանի ռեակտորները գործարկվել են 1977 թվականին։
