Ղրղզստանի՝ ազատազրկման դատապարտված նախկին նախագահը մեկուսարանից հիվանդանոց է տեղափոխվել

Ղրղզստանի նախկին նախագահ Ալմազբեկ Աթամբաևը, որին կոռուպցիոն գործով 11 տարի և 2 ամիս ազատազրկման են դատապարտել, Ազգային անվտանգության պետական կոմիտեի մեկուսարանից հիվանդանոց է տեղափոխվել։

Աթամբաևի մոտ երկկողմանի թոքաբորբ է ախտորոշվել։ Այս մասին հայտնում է Deustche Welle-ն։

Աղբյուրի փոխանցմամբ՝ նախօրեին Աթամբաևը դժգոհել է վատ ինքնազգացողությունից, ինչի կապակցությամբ նրանից COVID-19-ի թեստավորման համար նմուշառում է կատարվել։ Թեստի արդյունքը բացասական է եղել։

Ավելի վաղ՝ հունիսի 23-ին, հայտնի էր դարձել, որ Բիշքեկի դատարանը Ղրղզստանի նախկին նախագահ Ալմազբեկ Աթամբաևին 11 տարի և 2 ամիս ազատազրկման է դատապարտել: Պետության նախկին ղեկավարը մեղավոր է ճանաչվել կոռուպցիայի գործով։ Դատարանի որոշմամբ՝ Աթամբաևը կզրկվի նաև պետական պարգևներից և գույքից:

Հիշեցնենք՝ 2019-ի օգոստոսի 7-ին Աթամբաևի՝ մայրաքաղաք Բիշքեկից ոչ հեռու՝ Քոյ-Թաշ գյուղում գտնվող տան գրոհի ժամանակ հրաձգություն էր տեղի ունեցել։ Ղրղզստանի նախկին նախագահն ավելի ուշ խոստովանել էր, որ ինքը ևս հրաձգության մասնակից է եղել։ Հատուկ նշանակության ջոկատայիններին չէր հաջողվել Աթամբաևին միանգամից ձերբակալել. նախկին նախագահը միայն հաջորդ օրն էր հանձնվել։ Երկու օր տևած հրաձգության արդյունքում հատուկ նշանակության մեկ ջոկատային էր զոհվել, 136 մարդ՝ տուժել:

2011-2017 թվականներին Ղրղզստանը ղեկավարած Աթամբաևի դեմ պաշտոնավարման ժամկետի ավարտից հետո մի քանի քրեական գործ էր հարուցվել, որոնք վերաբերում են ղրղզական Քոյ-Թաշ գյուղում տարածքների ապօրինի ձեռքբերմանը, քրեական հեղինակություն Ազիզ Բատուկաևին ազատ արձակելուն և կաշառակերությանը։ Ավելի վաղ՝ 2019-ի հունիսի 27-ին, Ղրղզստանի խորհրդարանն Աթամբաևին զրկել էր նախկին նախագահի անձեռնմխելիությունից, ինչը մեծացրել էր նրան քրեական պատասխանատվության ենթարկելու հավանականությունը։

Նելլի Մելքոնյան