BBC News-ի ռեպորտաժը՝ Հայաստանում համաճարակային իրավիճակի մասին

Բրիտանական BBC News-ը ռեպորտաժ է (տեսանյութում՝ 4:26 րոպեից) պատրաստել մի շարք երկրներում կորոնավիրուսի համաճարակի հետ կապված իրավիճակի մասին։ Դրանում անդրադարձ կա նաև Հայաստանին։

Նշվում է, որ Հայաստանը Հարավային Կովկասում կորոնավիրուսից ամենից շատ տուժած երկիրն է․ 3 մլն բնակչություն ունեցող երկրում 22․000 մարդ վարակված է կորոնավիրուսով, 300-ից ավելի մարդ մահացել է։ Նշվում է նաև, որ Հայաստանը կարանտինից դուրս է եկել մայիսի սկզբին։

«Լոքդաունի ընթացքում ապրիլ ամսին, ՀՀ կառավարության տվյալներով, տնտեսությունը 17 տոկոս անկում է գրանցել»,- ասվում է տեսանյութում։

Դրանում ներկայացվում է նաև ՀՀ առողջապահության նախարար Արսեն Թորոսյանի խոսքը, որ վիրուսը հնարավոր չէ վերացնել։ «Մենք կարող ենք սահմանները տարիներով փակել, բիզնեսը կրկին ամիսներով փակել, բայց այդ դեպքում  կմահանանք այլ պատճառներից»,- ասում է Թորոսյանը։

BBC-ի մեկնաբանը նաև նշում է, որ ՀՀ Կառավարությունն ու վարչապետը քննդատությունների թիրախում են հայտնվել։ Ռեպորտաժում ներկայացվում են կադրեր հիվանդանոց վարչապետ Նիկոլ Փաշինյանի այցից, որտեղ երկրի ղեկավարին տեղեկացնում են, որ ընդամենը 3 ազատ տեղ կա։

Հեղինակը ներկայացրել է նաև կադրեր ՀՀ ԶՈՒ Գլխավոր շտաբի նախկին պետ Արտակ Դավթյանի որդու հարսանիքից՝ նշելով, որ այս ամենի արդյունքում տպավորություն է ստեղծվում, թե Կառավարությունը լուրջ չի վերաբերվում կորոնավիրուսի պայքարին։

«Հաջորդ օրը վարչապետն աշխատանքից ազատել է նրան ու այլ պաշտոնյաների։ Բայց սա չի բավարարում Հայաստանի ընդդիմությանը, որոնք պահանջում են ամբողջ Կառավարության հրաժարականը՝ համավարակի դեմ պայքարը ձախողելու համար»,- ասվում է ռեպորտաժում։

Հիշեցնելով, որ վարչապետ Նիկոլ Փաշինյանը երկու տարի առաջ իշխանության է եկել ժողովրդի շնորհիվ՝ տեսանյութի հեղինակը նշում է, որ կորոնավիրուսի համաճարակը հաղթահարելու հարցում նա հույսը կրկին ժողովրդի վրա է դրել։

«Այժմ, առերեսվելով իր վարչապետության ամենամեծ մարտահրավերին, նա իր հույսը ևս մեկ անգամ դնում է ժողովրդի վրա՝ հուսալով, որ նրանք մասնակցություն կունենան կորոնավիրուսի դեմ պայքարում»,- նշվում է ռեպորտաժում։

Էմմա Չոբանյան