12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
5 տարի է՝ ՊՆ-ն փորձում է ինձ «քցել»․ Տոնոյանի դեմ հաղորդման հիման վրա քրգործ է հարուցվել
Հասարակություն
19.06.2020 | 16:10
ՊՆ պահեստազորի սպա Ցոլակ Խաչատրյանը հանցագործության մասին հաղորդում է ներկայացրել պաշտպանության նախարար Դավիթ Տոնոյանի դեմ, ինչի հիման վրա Զինվորական քննչական կայազորային 4-րդ վարչությունում հարուցվել է քրեական գործ։ Այս մասին Factor.am-ին հայտնեց ՀՀ քննչական կոմիտեի տեղեկատվության և հասարակայնության հետ կապերի բաժնի պետ Ռիմա Եգանյանը։
Եգանյանի խոսքով՝ քրեական գործով Ցոլակ Խաչատրյանը ճանաչվել է տուժող, այլ դատավարական կարգավիճակ ունեցող որևէ անձ չկա:
Քրեական գործը հարուցվել է Քրեական օրենսգրքի 353-րդ հոդվածի 1-ին մասով (օրինական ուժի մեջ մտած դատավճիռը, վճիռը կամ դատական այլ ակտը, դատական ակտում սահմանված ժամկետում կամ ժամկետ սահմանված չլինելու դեպքում դատական ակտն ուժի մեջ մտնելուց հետո` մեկամսյա ժամկետում, պետական և տեղական ինքնակառավարման մարմինների պաշտոնատար անձանց կողմից դիտավորությամբ չկատարելը)։
ՊՆ պահեստազորի սպա Ցոլակ Խաչատրյանը Factor.am-ի հետ զրույցում նշեց, որ Վարչական վերաքննիչ դատարանի կողմից կայացվել է դատական ակտ, համաձայն որի՝ պարտապան է ճանաչվել ՊՆ-ն, որը պարտավորվել է Խաչատրյանին վճարել չտրամադրված ամենամյա արձակուրդների դիմաց փոխհատուցում։ Այդ որոշումը օրինական ուժի մեջ է մտել 2020 թվականի հունվարի 22-ին, սակայն մինչ օրս, ըստ Խաչատրյանի, այն չի կատարվել։
«ՀՀ ՔՕ 393-րդ հոդվածի առաջին մասով նախատեսված է քրեական պատասխանատվություն դատական ակտի պահանջները սահմանված ժամկետում չկատարելու համար, այսինքն, ըստ էության, ՊՆ-ն, որի ղեկավարն է Դավիթ Տոնոյանը, 5 ամիս է՝ չի կատարում դատական ակտի պահանջները։ Փոխհատուցման ընդհանուր չափը կազմում է մոտ 14 մլն դրամ»,- նշեց Խաչատրյանը։
Նա նաև ընդգծեց, որ պաշտպանության նախարար Դավիթ Տոնոյանը տեղյակ է եղել այս ամենի մասին, քանի որ նա պաշտոնապես գրություններ է ներկայացրել այդ հարցի առնչությամբ, հետևաբար՝ տվյալ կառույցը ստացել է դատական ակտի թե՛ օրինակը, թե՛ տեղյակ է դրա օրինական ուժի մեջ մտնելու հանգամանքից։
«Պաշտպանության նախարարությունից ես տարբեր ճանապարհներով, նաև Կառավարության միջոցով գրություններ եմ ստացել, նաև պատգամավոր Տիգրան Ուրիխանյանի կողմից է անձամբ հարցում կատարվել խնդրի առնչությամբ, և իրեն անձամբ Դավիթ Տոնոյանն է պատասխանել գրությամբ, որում անհեթեթ պատասխան է տվել՝ պատճառաբանել է արտակարգ դրության առկայությունը, բայց դա որևէ կերպ չի կարող ազդել սրա վրա»,- նշեց Ցոլակ Խաչատրյանը։
Հարցին՝ նախարարությունից որևէ արձագանք եղե՞լ է սկսված գործընթացի առնչությամբ, Խաչատրյանը պատասխանեց․ «Երեկ երեկոյան ինձ ՊՆ-ից զանգել են, ասել են, որպեսզի դիմումի տեսքով ներկայացնեմ հաշվեհամար, որի վրա փոխանցվի դատարանի որոշմամբ սահմանված գումարը»։
Անկախ այս հանգամանքից՝ Խաչատրյանը նշում է, որ պատրաստվում է գնալ մինչև վերջ։ «Անկախ նրանից, գումարը կստանամ, թե ոչ, արարքի համար պետք է մարդիկ պատասխան տան։ 5 տարի տվյալ կառույցը իմ անձի նկատմամբ ձեռառնելիք վերաբերմունք է ցուցաբերել, ամեն կերպ փորձում էր ինձ «քցել», ընդ որում՝ ոչ թե միայն ինձ։ Պատկերացնո՞ւմ եք՝ քանի զինծառայողների նկատմամբ է նմանատիպ վերաբերմունք ցուցաբերվել»,- նշեց Խաչատրյանը։
Հարցի առնչությամբ Factor.am-ը պարզաբանում է խնդրել նաև պաշտպանության նախարարության խոսնակ Շուշան Ստեփանյանից։ Այն ստանալուն պես կհրապարակենք։
Անժելա Պողոսյան
