ՀՀ-ում նաև քաղաքական կորոնավիրուս է տարածվում, որը կբերի բացիլի հատկանիշ ունեցող ուժերի մահվան․ Փաշինյան. ՏԵՍԱՆՅՈՒԹ

Ազգային ժողովում կորոնավիրուսի հետ կապված արդեն երեք հատուկ նիստ է տեղի ունեցել, և մի քանի անգամ հարցուպատասխան է եղել, քննարկում է եղել։ Կառավարությունում նույնպես ադ քննարկումները տեղի են ունենում: Պարետատան նիստից հետո հրավիրված ճեպազրույցի ժամանակ ասաց ՀՀ վարչապետ Նիկոլ Փաշինյանը՝ պատասխանելով հարցին, թե ՀՅԴ-ն առաջարկել է կորոնավիրուսի թեմայով ԱԺ հատուկ նիստ հրավիրել՝ Կառավարության հետ քննարկելու ճգնաժամից դուրս գալու լուծումներ և պատասխանատվության կանչելու ձախողած բոլոր պաշտոնատար անձանց՝ սկսած թիվ մեկ պատասխանատու վարչապետից:

«Ես ուղղակի ուզում եմ արձանագրել, որ Դաշնակցության համար, մեծ հաշվով, ոչ մի բան չի փոխվել, որովհետև Դաշնակցության ներկայացուցիչները այդ նույն հռետորաբանությամբ և Կառավարության հրաժարականի ենթատեքստով խոսում էին 2018 թվականի ամռանը, երբ ընդամենը 1-2 ամիս էր անցել Կառավարության ձևավորումից: Եվ ուզում եմ ասել, որ այնպիսի տպավորություն կա, որ Հայաստանում ոչ միայն առողջապահական կորոնավիրուս է տարածվում, այլև քաղաքական կորոնավիրուս, որը, ի տարբերություն առողջապահականի, իմ կարծիքով՝ կբերի այդպիսի բացիլի հատկանիշ ունեցող քաղաքական և հասարակական ուժերի՝ քաղաքական իմաստով մահվան: Դա իմ համոզմունքն է»,- հայտարարեց Նիկոլ Փաշինյանը:

Նրա խոսքով՝ այդ քաղաքական ուժերն ամբողջությամբ դուրս կմղվեն Հայաստանի քաղաքական, հասարակական կյանքից, որովհետև իրենք, ըստ էության, «այս օրերին իրենց գործունեությամբ կառուցում են իրենց քաղաքական գերեզմանաքարը»։

«Հիմա ընդունված է կորոնավիրուսի համատեքստում խոսել պատերազմական հռետորաբանությամբ։ Անկեղծ ասած՝ հայեցակարգային առումով այնքան էլ հաշտ չեմ այդ մտքի հետ, որովհետև ես կարծում եմ, որ ճգնաժամին մենք միշտ և բոլոր դեպքերում պետք է նայենք որպես հնարավորություն: Բայց եթե նույնիսկ հարգելով այդ տրամաբանությունը, այսօր կան ուժեր և շրջանակներ, որոնք այսպիսի հռետորաբանություն են զարգացնում, ասում են՝ երբ հրամանատարը կամ հրամանատարությունը պատերազմի ժամանակ ձախողվում է, նա պետք է հեռանա: Եթե պատերազմական տրամաբանությամբ են խոսում, և մարդիկ ուզում են Կառավարության գործողությունները դիտարկել պատերազմական տրամաբանության շրջանակներում, եկեք դիտարկենք․ իսկ պատերազմի ժամանակ ի՞նչ են անում խուճապ տարածողների հետ, իսկ պատերազմի ժամանակ ի՞նչ են անում սխալ տեղեկատվություն տարածողների դեմ, իսկ պատերազմի ժամանակ ի՞նչ են անում հրամանատարի դեմ խոսողների հետ: Նրանց դատում են ռազմական և պատերազմական իրավիճակին համապատասխան»,- ասաց Նիկոլ Փաշինյանը:

Մանրամասները՝ տեսանյութում։