Մարզահամերգային համալիրում կորոնավիրուսով հիվանդներ կա՞ն․ պարզաբանում է ԱՆ խոսնակը

6 մահ և 452 հաստատված դեպք՝ 1 օրում․ սա, մարտի 1-ից ի վեր, Հայաստանի կորոնավիրուսային ռեկորդն է։ Ընդհանուր առմամբ՝ մինչ օրս հանրապետությունում վարակի 7․113 դեպք է գրանցվել, հիվանդներից միայն 3․145-ն է ապաքինվել։ 3842 քաղաքացի շարունակում է բուժում ստանալ։

Առողջապահության նախարար Արսեն Թորոսյանը, սակայն, դեռ երեկ՝ ռեկորդային 452 դեպքի նախօրեին, հայտարարեց, որ կորոնավիրուսային հիվանդության բուժման համար ծավալված 186 ռեանիմացիոն մահճակալից 154-ն արդեն զբաղված է, ազատ է ընդամենը 32 մահճակալ։ Սրան զուգահեռ, նախարարի հրապարակած տվյալներով, դեռ մայիսի 24-ի դրությամբ՝ հանրապետությունում գրանցվել է 230 ծանր և 52 ծայրահեղ ծանր պացիենտ։ Այդ դեպքում ինչպե՞ս է կազմակերպվում ծանր և ծայրահեղ ծանր հիվանդների բուժումը, եթե ազատ մահճակալ, գրեթե, չի մնացել։

Հարցի շուրջ պարզաբանում ստանալու համար Factor.am-ը դիմեց Առողջապահության նախարարության մամուլի խոսնակ Ալինա Նիկողոսյանին։ Նա մեզ փոխանցեց, որ այսօրվա դրությամբ՝ հանրապետության ռեանիմացիոն մահճակալները դեռ ամբողջությամբ զբաղված չեն և բավարարում են բուժում ստացող ծանր հիվանդներին։

Առողջապահության նախարարության խոսնակից հետաքրքրվեցիք նաև՝ արդյո՞ք Կարեն Դեմիրճյանի անվան մարզահամերգային համալիրում կորոնավիրուսով հիվանդների համար առանձնացված մահճակալները դեռևս պետք չեն եկել։ Ալինա Նիկողոսյանը փոխանցեց, որ առայժմ մարզահամերգային համալիրում տեղադրված մահճակալները դատարկ են, այնտեղ կորոնավիրուսով հիվանդներ չկան։

Նելլի Մելքոնյան