Հասարակություն
20.05.2020 | 17:36
Իշխանությունն այսօր չկարողացավ ապահովել մասնակցային ժողովրդավարության տարրական էլեմենտները: Վեթինգի թեմայով այսօր կազմակերպված քննարկման ժամանակ նման տեսակետ հայտնեց փաստաբան Տիգրան Եգորյանը:
Նրա խոսքով՝ վեթինգի անհրաժեշտության հարցով կոնկրետ բովանդակություն չի քննարկվում, և դրա վերաբերյալ ինչ-որ արձագանքներն են հնչեցվում, թե, իբր, վեթինգ չենք կարողանում անել, որովհետև հակասում է Սահմանադրության. «Եվ այդ վեթինգի՝ Սահմանադրությանը հակասելու տակ ինչ ասես՝ կարելի է մտածել»:
Ըստ Տիգրան Եգորյանի՝ երբ քննարկվում էր, որ սահմանադրական փոփոխությունները որոշակիորեն տևական ժամանակահատված ենթադրող գործընթաց են՝ հաշվի առնելով ժողովրդավարության բարձր չափանիշները, քննարկվում էր, թե ինչ միջոցներ կան, որոնք ավելի կարճ ժամանակաընթացքում հնարավոր կլինի որպես գործիք ձևակերպել և գործի դնել:
«Կարևորը դա ձևակերպելն ու գործի դնելն էր, որովհետև դրա ազդեցությունը շատ ավելի մեծ բարերար հետևանքներ բերելու պոտենցիալ ուներ: Եվ այս մեխանիզմները խարսխվում էին Դատական օրենսգիրք սահմանադրական օրենքի լուծումների վրա: Այս լուծումների կապակցությամբ կային տարբեր մոտեցումներ և գործիքներ, որոնք կիրառելու պարագայում, ամբողջությամբ տեղավորվելով Սահմանադրության և դրանով սահմանված ընթացակարգերի մեջ, հնարավոր էր իրագործել այն կամ նրա մի մասը, ինչը անվանվում է վեթինգ և տարբեր մարդկանց կողմից տարբեր կերպ է ընկալվում»,- ասաց նա:
Եգորյանն ասաց՝ դատական իշխանության ուռուցքը տեղաբաշխված է եռաստիճան համակարգի տարբեր սեգմենտներում, և շատ հեշտ է այն տեղորոշել. ուղղակի ֆիլտրեր պետք է տեղադրվեին, իսկ դա պետք է իրագործեր Բարձրագույն դատական խորհուրդը (ԲԴԽ):
«Եվ այս պարագայում ԲԴԽ-ի նույնիսկ ամենաարատավորված կազմը չէր ունենալու այլընտրանք՝ չգնալու այս օրենքների պատշաճ կատարման ճանապարհով: Այդ այլընտրանքը կնշանակեր ինքնասպանություն, որովհետև նրանք պետք է արդեն ժողովրդի խոշորացույցի ներքո պաշտպանեին այն հանցագործներին, որոնք կերտել են այսօրվա, այսպես կոչված, արդարադատության համակարգը»,- ասաց նա:
Սակայն իշխանությունը, փաստաբանի խոսքով, որոշեց գնալ այլ ճանապարհով՝ բարեփոխել ԲԴԽ-ն. «Բայց, փաստորեն, ստացվեց, որ ԲԴԽ-ում նշանակումները որևէ արդյունք չտվեցին: Այսօրվա վերջին զարգացումներից պարզվում է, որ իրենք էլ չեն պատկերացնում, թե իրենք ինչով կարող են զբաղվել, ինչով՝ չէ: Ինչ-որ խուճապի մեջ անկանոն գործողությունների տպավորություն է»:
