09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Հանրային տրանսպորտի վերագործարկում, դիմակով ու ձեռնոցով ուղևորներ. ի՞նչ իրավիճակ է Գյումրիում. ԼՈՒՍԱՆԿԱՐՆԵՐ
18.05.2020 | 16:16
Մայիսի 18-ից, պարետի որոշմամբ, Հայաստանում արտակարգ դրությամբ պայմանավորված մի շարք սահմանափակումներ թուլացվում են։ Այսօրվանից աշխատում է նաև հանրային տրանսպորտը։
Սահմանափակումների թուլացմանը զուգահեռ՝ կյանքը Գյումրիում վերադառնում է բնականոն հուն։ Քաղաքի կանգառները, սակայն, այնքան էլ մարդաշատ չեն՝ մեկ-երկու հոգու կարելի է հանդիպել։ Միկրոավտոբուսներում ու ավտոբուսներում էլ կանգնած ուղևորներ չկան, քանի որ թույլատրելի է միայն նստատեղերի քանակով ուղևորների առկայությունը։
Բոլորը՝ վարորդներն ու ուղևորները, դիմակներով ու ձեռնոցով են, «Մուտքը միայն ձեռնոցներով ու դիմակներով» գրառումն էլ փակցված է տրանսպորտային բոլոր միջոցներում: Դրանցում նաև առկա են ախտահանիչ լուծույթներ ու հատուկ տարա, որտեղ մարդիկ թողնում են ուղեվարձը։
Նշենք, որ կանգառներում իրավիճակին հետևող ոստիկանների չհանդիպեցինք, սակայն մարդիկ հիմնականում պահպանում են սոցիալական հեռավարությունը։
Ընդհանուր առմամբ, նախորդ օրերի պես՝ այսօր ևս Գյումրիի փողոցները մարդաշատ են։ Կրկին հերթեր են բանկերի ու բանկոմատների մոտ, ինչը պայմանավորված է պետության կողմից տրվող սոցիալական աջակցության գումարների ստացմամբ։ Նշենք նաև, որ այսօր դիմակով ու ձեռնոցով քաղաքացիների թիվը, նախորդ օրերի համեմատ, բավական մեծ է:
Էմմա Չոբանյան
