11.02.2026 | 17:35
Shield AI-ի հետ քննարկվել են ռազմարդյունաբերության ոլորտում համագործակցության հեռանկարները
ՍԴ խնդիր. գնալ հանգուցալուծմա՞ն, թե՞ հետ կանգնել
Քաղաքականություն
17.05.2020 | 20:56
Մայիսի 14-ին Հայաստանում արտակարգ դրության ռեժիմը ևս մեկ անգամ երկարաձգվեց, այս անգամ՝ մինչև հունիսի 13-ը։ Սա նշանակում է, որ իշխանության ծրագրած Սահմանադրական փոփոխության հանրաքվեի իրագործումն էլ ավելի է հեռվանում, թեև իշխող ուժի ներկայացուցիչները բազմիցս հայտարարել են, որ Սահմանադրական դատարանում ճգնաժամ է առկա և այն պետք է հանգուցալուծել։
ԱԺ անկախ պատգամավոր Արման Բաբաջանյանը համամիտ է այս տեսակետին. նա կարծում է՝ անկախ համավարակի պայմաններից՝ ՍԴ խնդիրը պետք է օր առաջ լուծել։
«Ճգնաժամը չի վերացել, և մենք այսօր ունենք կորոնավիրուսի հույսին մնացած Սահմանադրական դատարան։ Եվ մենք չենք կարող ՍԴ-ն թողնել ճգնաժամի մեջ, թողնել կորոնավիրուսի հույսին և թույլ տալ, որպեսզի համավարակի հույսին մնացած ՍԴ յոթ անդամները շարունակեն իրենց գործունեությունը և կայացրած որոշումներով խոչընդոտ հանդիսանան մեր երկրի ժողովրդավարացմանն ու առաջընթացին»,- ասաց նա։
ՍԴ դատավորների լիազորությունների դադարեցման հարցը կարող է լուծել միայն Սահմանադրությունը: Factor.am-ի հետ զրույցում նման կարծիք հայտնեց Փաստաբանների պալատի նախագահ Արա Զոհրաբյանը։ Իսկ Սահմանադրությունը կարելի է փոփոխել կամ նոր Սահմանադրություն ընդունել միայն հանրաքվեի ճանապարհով։ Այս համատեքստում Զոհրաբյանն ի սկզբանե իշխող ուժի նախաձեռնած գործընթացում իրավական խնդիր էր տեսնում:
«Այն փոփոխության նախագիծը, որը հետագայում պետք է դրվեր հանրաքվեի, նախապես չի ուղարկվել ՍԴ՝ կարծիքի։ Եթե նոր Սահմանադրության նախագիծ լիներ, ոչ թե Սահմանադրության փոփոխության, ապա ՍԴ նախնական վերահսկողության կարիքը չէր լինի։ Ես հասկանում եմ նաև նախաձեռնողի՝ իշխանության մոտեցումը, որ ՍԴ-ին վերաբերող հարց է և իրենց ներկայացնելու տեսակետից կարող են, բնականաբար, խիստ սուբյեկտիվ պատասխան ստանալ։ Բայց միևնույն է, մենք ունենք այդ ընթացակարգը և դա շրջանցել չի կարելի։ Շրջանցելու դեպքում իրավական խնդիր կունենանք ապագայում»,-ասաց Զոհրաբյանը։
Նշենք, որ երեկ առցանց ասուլիսի ժամանակ վարչապետ Նիկոլ Փաշինյանը հայտարարեց, որ քննարկվում է ՍԴ ճգնաժամն Ազգային ժողովի միջոցով հանգուցալուծելու հարցը։ Իշխող ուժն այս հարցով խորհրդատվություն ստանալու նպատակով դիմել է Վենետիկի հանձնաժողով։
Մերի Մարտիրոսյան
