Միքայել Մինասյանի խոհանոցային «բացահայտումներն» ու իշխանության լռությունը. ինչ սպասել առաջիկայում. ՏԵՍԱՆՅՈՒԹ

Հայաստանի իշխանությունները շարունակում են չպատասխանել Սերժ Սարգսյանի փեսա Միքայել Մինասյանի հնչեցրած մեղադրանքներին: Միքայել Մինասյանը, որին մեղադրում են փողերի լվացման, անշարժ գույքի սեփականաշնորհման և այլ անձանց միջնորդությամբ այս կամ այն բիզնեսներում «փայ մտնելու» համար, արդեն երրորդ տեսանյութն է հրապարակել, որտեղ հերթական սուր քննադատություններն է հնչեցնում իշխանության հասցեին:

Մինասյանի աղմկոտ հայտարարություններին զուգահեռ տարօրինակ կերպով լռում են իշխանությունները: Կառավարող ուժից պատգամավոր Հրաչյա Հակոբյանն ասում է՝ անհայտ խոհանոցից հնչող անհիմն մեղադրանքներին պատասխանելու ցանկություն չունեն: Միքայել Մինասյանը պնդել է, որ Փաշինյանը ՀՀ-ն ներքաշել է միջազգային մաֆիոզական համակարգի մեջ, որն ուղղակի խփում է ՀՀ-ի հեղինակությանը:

Սերժ Սարգսյանի փեսան ակնարկում է Հայաստանից Ռուսատան տեղափոխված 40 տոննա ծխախոտը, որն առգրավվել է: Ըստ իշխանության ընդդիմախոսի՝ անօրինական ծխախոտը արտահանվել է Փաշինյանների մասնակցությամբ:

Հրաչյա Հակոբյանը սա որակում է կեղծ տեղեկություն և քննարկում է Մինասյանին դատի տալու հարցը:

Քաղաքագետ Վիգեն Հակոբյանը Միքայել Մինասյանի կողմից նման տեսանյութեր հրապարակելը համարում է մուտք քաղաքականություն: Ըստ Հակոբյանի՝ Մինասյանն այն, ինչ անում էր միջնորդավորված, այժմ որոշել է անել բացահայտ: Սակայն քաղաքագետը տարակուսելի է համարում իշխանության լռությունը, ասում է, թե կասկածի տեղիք են տալիս:

Վիգեն Հակոբյանի կարծիքով՝ սխալ է, երբ իշխանությունները Մինասյանի մեղադրանքներին պատասխանելու փոխարեն հայտարարում են, թե նա նախկին կոռումպացված ռեժիմի ներկայացուցիչ է: Այսօրինակ պատասխանները քաղաքագետը որակում է փախուստ իրական պատասխանից: Նրա խոսքվ՝ այս հարցերը արդիական կդառնան և պատասխաններ կապահանջվեն այն ժամանակ, երբ իշխանության ռեյտինգը կընկնի:

Իսկ մինչ այդ, քաղաքագետը հիշում է, թե ինչպես էր ժամանակին Նիկոլ Փաշինյանը հայտարարում, որ այս կառավարությունը ամենաթափանցիկն է լինելու:

Իսկ ահա քաղաքագետ Հակոբ Բադալյանն էլ կարծում է, որ Միքայել Մինասյանն անհրաժեշտ լեգիտիմություն չունի, ուստի իր մեղադրանքները բացասական են անդրադառնում հենց իր անձի նկատմամբ:

Քաղաքագետը կարծում է, որ Մինասյանի այս պայքարը ավելի շատ ընդդիմադիր դաշտում դիրքերն ամրապնդելու համար են: Այս առումով նախկինների շրջանում կան լուրջ տարաձայնություններ:

Միքայել Մինասյանի ակտիվությունը չի բացառվում, որ պայմանավորված է ՌԴ ԱԳ նախարար Սերգեյ Լավրովի վերջին հայտարարությամբ: Բադալյանի դիտարկմամբ՝ նախկինները խոր կապեր ունեն ռուսաստանյան շրջանակների հետ և Լավրովի հայտարարությունը դիտարկել են գործողությունների ազդակ:

Թե մերժված իշխանության առանցքային ներկայացուցիչ Միքայել Մինասյանի դիրքերն ինչպես կամրապնդվեն հայաստանյան ներքաղաքական կյանքում, և նա ինչ հաջողություններ կունենա ընդդիմության հավանական լիդերի կարգավիճակում՝ եզրակացնելը բարդ է:

Համենայնդեպս Մինասյանն առայժ աչքի է ընկել իր մեկ նորամուծությամբ. նա Հայաստանի և ժողովրդի խնդիրներից է խոսում անհայտ երկրից և երբեմն սոցիալապես անապահով քաղաքացիների քննարկումների կենտրոնում առավել հայտնվում է նրա շքեղ խոհանոցը, քան բարձրացված խնդիրները:

Նարեկ Կիրակոսյան