17.06.2026 | 10:38
NYMEX. Ոսկու գինն աճել է 0.61%-ով և կազմել 4339.00 դոլար
Կորոնավիրուսից մահվան ևս 2 դեպք Անիի տարածաշրջանում. Գյումրու ինֆեկցիոնում 89 հիվանդ է բուժվում
11.05.2020 | 15:03
Վերջին երկու օրում կորոնավիրուսից մահացածներից 2-ը Շիրակի մարզի Անիի տարածաշրջանի բնակիչներ են, որոնք հիվանդության առաջին իսկ օրից բուժում ստացել են մայրաքաղաքում։ Այս մասին տեղեկանում ենք Շիրակի մարզպետարանից։
Անի խոշորացված համայնքի ղեկավար Արտակ Գևորգյանը Factor.am-ի հետ զրույցում ասաց՝ մահացածները Մարալիկի բնակիչներ են, ունեցել են հիվանդություններ։
Ըստ համայնքի ղեկավարի՝ չնայած մահվան դեպքերին՝ իրավիճակը Անիի տարածաշրջանում կայուն է։
«Կորոնավիրուսի նոր դեպքերը հիմնականում հիվանդանոցի շրջանակի հետ առնչություն ունեն, որն ինչ-որ տեղ շղթա է։ Իրավիճակը կայուն է, մի փոքր ավելի զգուշավոր, որը զգոնության է բերում»,- ասաց Արտակ Գևորգյանը։
Նշենք, որ Շիրակի մարզպետարանի հրապարակած տվյալների համաձայն՝ Գյումրու ինֆեկցիոն հիվանդանոցում, մայիսի 11-ի դրությամբ, կորոնավիրուսով 89 հիվանդ է բուժվում, նրանցից 71-ը Շիրակի մարզի բնակիչներ են: Առողջացածների թիվն ավելացել է ևս երկուսով՝ 26 առողջացման դեպք կա։ 21 հիվանդ բուժում է ստանում Երևանում:
Հիվանդության անախտանիշ ընթացքով 50 պացիենտներ տեղափոխվել են Ծաղկաձորի հյուրանոցներ։
Շիրակի մարզում այս պահին մեկուսացման և ինքնամեկուսացման ցուցում ունի 271 քաղաքացի։ Մարտի 1-ից մինչ օրս մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 1.284 նմուշառում։
Հավելենք, որ ընդհանուր առմամբ, Շիրակի մարզում կորոնավիրուսից մահացել է 6 պացիենտ։ Նախորդ դեպքերից 3-ը ևս գրանցվել էին Անիի տարածաշրջանում՝ Մարալիկ ու Ձորակապ համայնքներում, մեկը՝ Գյումրիում։
Էմմա Չոբանյան
