20.02.2026 | 13:53
Մեղրի համայնքին է վերադարձվել շուրջ 3.15 հա մակերեսով 6 հողամաս. Դատախազություն
Կանանց նկատմամբ բռնության ահազանգերն աճել են, սահմանափակումները սրացնում են վիճակը. Զառա Հովհաննիսյան
Հասարակություն
20.04.2020 | 22:14
Ընդդեմ կանանց նկատմամբ բռնության կոալիցիայի թեժ գծերին մարտ ամսին 803 զանգ է ստացվել։ Վերլուծելով այս ցուցանիշը՝ կոալիցիայից նշում են՝ կարող են հստակ ասել, որ 30%-ով ավելացել են ընտանեկան բռնության թեժ գծերի հեռախոսազանգերը՝ այս տարվա նախորդ երկու ամիսների համեմատ։ Ընդ որում, կանայք զանգահարում են թե՛ բռնության հետ կապված խորհրդատվության, թե՛ սոցիալական աջակցության համար։
Հատուկ դրության հաստատման և տանը մնալու կարգադրության արդյունքում կանայք ավելի են տուժում՝ ընտանեկան բռնության, կենցաղում հոգսերի անհավասար բաշխման, սահմանափակ նյութական հնարավորությունների և աղքատության պատճառով։ Իրավապաշտպան Զառա Հովհաննիսյանը Factor.am-ի հետ զրույցում ասաց՝ ահազանգերի ավելացումը պայմանավորում է այն հանգամանքով, որ մարդիկ տանն են, նյարդերը լարված են։
«Սահմանափակումները սրացնում են վիճակը, քանի որ ներս ու դուրս վիճակը դժվար է կազմակերպել և ցանկացած լարվածություն կարող է հանգեցնել նաև բռնության»,-նշեց նա։
Իրավապաշտպանն ասաց, որ կան նաև սոցիալական աջակցության խնդրանք պարունակող զանգեր։
«Կանայք էլ ավելի խոցելի են դառնում այս իրավիճակում, հատկապես՝ նախկինում աջակցություն ստացած, բռնությունը վերապրած կանայք»,- ընդգծեց նա։
Զառա Հովհաննիսյանը շեշտեց նաև՝ գուցե բռնության դեպքերն այժմ ավելի շատ են, քան արտացոլված է զանգերի տեսքով. «Մենք այժմ չենք կարող ամբողջ պատկերն իմանալ, քանի որ զանգահարելու խնդիր կա։ Տնից զանգ կատարելը կարող է խնդրահարույց լինել կանանց համար»։
Իրավապաշտպանի խոսքով՝ այս դժվարությունից ելնելով, նախկինում կանայք անձամբ են այցելել աջակցման կենտրոն, իսկ ներկայում՝ արտակարգ դրության պայմաններում առկա տեղաշարժման սահմանափակումներից ելնելով, դա չեն կարող անել։
Մերի Մարտիրոսյան
