Հետամուտ եմ լինելու, որ շանը մեքենայից կապած անձն արժանի պատիժը ստանա․ Նաիրա Զոհրաբյան

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը, համացանցում տեսնելով կենդանու նկատմամբ դաժան վերաբերմունք ցուցաբերելու կադրերը, հայտարարություն է տարածել՝ դիմելով  Ոստիկանությանը։ Այս մասին պատգամավորը հայտնեց Factor.am-ի հետ զրույցում։

Հիշեցնենք, որ այսօր համացանցում տեսանյութ էր տարածվել, որում երևում էր, թե ինչպես է մի քաղաքացի շանը մեքենային կապած քարշ տալիս ասֆալտի վրայով։ Ավելի ուշ Ոստիկանույթւոնից հայտնեցին, որ քաղաքացին հայտնաբերվել և տարվել է Ոստիկանության Էրեբունու բաժանմունք։

«Առավոտից ես մի 70-80 օգտատիրոջից ստացել եմ այդ տեսանյութը, թե ինչպես է մի ինչ-որ սուբյեկտ, որովհետև ես ամենամեծ ցանկության դեպքում նույնիսկ չեմ կարող նրան մարդ համարել, էդպես դաժանորեն թոկը շան վզից կապած մեքենայի հետևից գցած վազեցնում։ Սարսափելի է մարդկային այս դաժանությունը, չես հասկանում՝ այս մարդիկ Դարվինի էվոլիուցիայի որ փուլում են մնացել, որ այդպես էլ չեն մարդկայնացել։ Ես, բնականաբար, անմիջապես ֆեյսբուքի իմ սոցիալկան էջում հայտարարություն եմ տարածել, դիմել եմ ոստիկանապետին, որ իմ հայտարարությունը ընդունի որպես հայտարարություն հանցագործության մասին։ Իմ օգնականները Ոստիկանության Էրեբունի բաժանմունքից ճշտեցին, որ արդեն իսկ նախապատրաստվում են նյութեր այս դեպքի հետ կապված, և ես մի բան կարող եմ ասել, որ որպես քաղաքացի, պատգամավոր, և Մարդու իրավունքների հանձնաժողովի նախագահ, հետամուտ եմ լինելու, որ տվյալ պերսոնաժը, որի դեմքին նայելով հասկանում ես, որ հոմո սափիենսից միլիարդավոր լուսնային կիլոմետրեր հեռու է, իր արժանի պատիժը ստանա Քրեական օրենսգրքի ողջ խստությամբ»։

Հիշեցնենք, որ կենդանիների հանդեպ դաժան վերաբերմունքը քրեականացնող նախագիծն ընդունվեց նածորդ տարի։ Նախագծի համահեղինակներից է ԱԺ պատգամավոր Նաիրա Զոհրաբյանը։

Այսպիսով՝ կենդանիների նկատմամբ դաժան վերաբերմունքը, որը զուգորդվել է խուլիգանական դրսևորումներով և հանգեցրել կենդանիների ոչնչացմանը կամ խեղմանը, պատժվում է տուգանքով՝ նվազագույն աշխատավարձի հարյուրապատիկից երեք հարյուրապատիկի չափով, կամ կալանքով՝ 1-3 ամիս ժամկետով, կամ ազատազրկմամբ՝ մինչև մեկ տարի ժամկետով:

Անժելա Պողոսյան