Ինչո՞ւ հենց այս փուլում Սարգսյանը խոսեց ցավոտ լուծման մասին

Օրերս Սերժ Սարգսյանը ՀՀԿ-ի «Անդրանիկ Մարգարյան» քաղաքական դպրոցում դասախոսելիս անդրադարձել է ղարաբաղյան խնդրի կարգավորմանը՝ նշելով, որ լուծումը ցավոտ է լինելու:

Ինչո՞ւ հենց այս փուլում Սարգսյանը որոշեց խոսել ցավոտ լուծման մասին և ի՞նչ նկատի ուներ նա՝  ցավոտ ասելով: Քաղաքագետ Ստյոպա Սաֆարյանի կարծիքով՝ սա կարող է կապված լինել նոյեմբերի 24-ին Հայաստան Եվրամիություն համաձայնագրի ստորագրման հետ. «Այն, ինչի մասին հանկարծ խոսեց Սերժ Սարգսյանը, ռիսկի կառավարում է և ոչ թե հավատ, որ դա տեղի կունենա: Սերժ Սարգսյանը հասկանում է, և կարծում եմ, միջնորդներն էլ են հասկանում, որ այս պահին շատ կարևոր է, որ ՀՀ-ԵՄ համաձայնագրի ստորագրումը տեղի ունենա: Ես ՍԵրժ Սարգյանի այս հայտարարությունը կապում եմ նրա հետ, որ մինչև նոյեմբերի 24-ը և դրանից հետո, Ադրբեջանը չդիմի ռազմական գործողությունների, չավելանան պատերազմի ռիսկերը, հայկական կողմի վախերը, որոնք հրաշալի օգտագործվում են Ռուսաստանի կողմից և վերջինս չստիպի հրաժարվել համաձայնագրի ստորագրումից»:

20 տարի շարունակվող բանակցությունները պետք է ի վերջո կարգավորվեն փոխզիջումային տարբերակով, նշում է քաղաքագետ Երվանդ Բոզոյանը: Ըստ քաղաքագետի՝ անկախ հասարակության արձագանքից՝ զիջումներ, այնուամենյանիվ, կլինեն: 2016թ. ապրիլյան պատերազմից հետո, նաև «Սասնա ծռերի» կողմից ՊՊԾ գնդի գրավման ընթացքում ակնհայտ դարձավ, որ հողերի հանձնման հեռանկարը կարող է շատ լուրջ հանրային ընդվզում առաջացնել: Արդյոք Սերժ Սարգսյանի նշած ցավոտ լուծումը, որը նշանակելու է տարածքների զիջում, չի՞ հանգեցնի համազգային ընդվզման:

Քաղաքագետ Ստեփան Սաֆարյանը կարծում է, որ Սերժ Սարգսյանն ինքն էլ գիտի, որ ռեակցիան բավականին բուռն է լինելու, հատկապես ապրիլյան պատերազմից հետո տարածքներ խաղաղության դիմաց բանաձևն այլևս չի աշխատում:

Լիլիթ Շաբոյան