Նման աշխատելաոճը հետևանքներ կունենա, ամենակարևոր արձանագրումը սա էր. Արման Բոշյանը՝ վարչապետի հանձնարարականները չկատարելու մասին

Կորոնավիրուսի տարածման այս օրերին ինքնամեկուսացած պատգամավորներից մեկն «Իմ քայլը» խմբակցության պատգամավոր Արման Բոշյանն է։ Պատգամավորը Factor.am-ի հետ զրույցում ասաց՝ հիմնականում փորձում է տանը մնալ, բայց անհրաժեշտության դեպքում նաև աշխատավայր կամ խանութ է գնում:

Բոշյանը պատմեց, որ այսօր Ազգային ժողով է գնացել՝ մի քանի թուղթ վերցնելու ու նաև խանութ: Հարցին՝ չի՞ ձանձրանում, պատգամավորը պատասխանեց. «Չեմ ձանձրանում, քանի որ «լավ հնարավորություն» է՝ կուտակված գրքացանկը թեթևացնելու: Մի գիրք արդեն ավարտել եմ ու անցել հաջորդին»։

Կառավարության այսօրվա նիստում վարչապետն ասաց, որ բիզնեսին աջակցություն է տրամադրվելու։ Երեկվա հարցազրույցում էլ Նիկոլ Փաշինյանը հայտնեց, որ 150 մլրդ դրամ է ուղղվելու տնտեսությանը։ Այս քայլերը, ըստ պատգամավորի, դրական ազդեցություն կթողնեն, քանի որ խոսքը մեծ գումարի մասին է։

Նիկոլ Փաշինյանն այսօր նշեց նաև, որ իր հանձնարարականները չեն կատարվում և ստիպված է լինում հրապարակավ ասելու այդ մասին։ Հարցին՝ սա ինչի՞ մասին է խոսում, Բոշյանն արձագանքեց. «Մեծ հաշվով, իհարկե, ընդունելի չի, երբ կառավարության ղեկավարի հանձնարարականները ձգձգվում են կամ ինչ-որ պատճառով իրականություն չեն դառնում։ Կարծում եմ՝ ամենակարևոր արձանագրումն այն էր, երբ վարչապետն ասաց, որ նման աշխատանքային պրակտիկան ընդունելի չի կարող լինել և հատուկ ընդգծեց, որ սա ապագայում հետևանքներ կունենա։ Կարծում եմ՝ ժամանակի ընթացքում բոլորի համար ակնհայտ կլինի, որ այդ աշխատելաոճը, դանդաղկոտությունը կամ կիսատ աշխատանքը չի կարող ընդունելի լինել և հետևանքներ է ունենալու։ Վստահ եմ, որ սա ժամանակի ընթացքում շտկվող հարցերի շարքից է»։

Մերի Մարտիրոսյան