Բանկերի հաճախորդներն ահազանգում են՝ գործարքները մերժվում են

Հայաստանյան բանկերի մի շարք հաճախորդներ ահազանգում են Factor.am-ին՝ տեղեկացնելով, որ անհնար է անկանխիկ գործարքներ իրականացնել։ Խոսքը վերաբերվում է ոչ միայն, օրինակ, սուպերմարկետում վճարում կատարելուն, այլև բանկոմատից գումար կանխիկացնելուն։

Քաղաքացիները դժգոհում են, որ կանգնում են տհաճ փաստի առաջ՝ խանութներում առևտուր են անում, բայց անկանխիկ վճարումը մերժվում է, և ստիպված են լինում ձեռնունայն դուրս գալ խանութից։

Որոշ դեպքերում անգամ ժամանակավորապես զրոյացել են քարտային հաշիվները, ինչպես, օրինակ, Ինեկոբանկի մի հաճախորդի պարագայում։ Բանկից նրան հորդորել են չանհանգստանալ, ու թեև զրոյացած հաշիվը քիչ անց վերականգնվել է, այդուհանդերձ, գործարք այդպես էլ հնարավոր չի եղել իրականացնել։

Factor.am-ը Կենտրոնական բանկից մեկնաբանություն խնդրեց բողոքների վերաբերյալ։ Հասարակայնության հետ կապերի ծառայության ղեկավար Հարություն Բերբերյանը պատասխանեց՝ չի կարող ասել, թե ինչ խնդիր կա, քանի որ գործ ունենք մասնավոր բանկերի հետ:

«Հստակ չեմ կարող ասել՝ խնդիրն ինչից է առաջացել։ Կարող է՝ մի բանկում խնդիր կա, մյուսում չկա, կարող է՝ դա նույնիսկ կախված է այն բանի հետ, որ վերջին օրերին սկսել են ավելի շատ անկանխիկ գործարքներ կատարել, և համակարգերում խնդիր է առաջացել։ Բայց կարող եմ ասել՝ համատարած, մասսայական նման խնդիր չկա, եթե լիներ, մենք դրա մասին կիմանայինք, որովհետև իրականացնում ենք մշտադիտարկում։ Հնարավոր են մասնավոր դեպքեր»,- ասաց Հարություն Բերբերյանը։

Նա քաղաքացիներին հորդորեց նման դեպքերում զանգահարել իրենց թեժ գծին, որտեղ յուրաքանչյուր դիմում անհատական ընթացք կստանա։

Հարկ է նկատել, որ թեժ գիծը աշխատում է մինչև 18։00-ն։