08.06.2026 | 12:41
«Ականատես» դիտորդական առաքելության ասուլիսը. ՈՒՂԻՂ
Հայաստանում արձանագրվել է կորոնավիրուսով վարակի 5-րդ դեպքը. Առողջապահության նախարարությունը դեռ չի հաստատում (ԹԱՐՄԱՑՎԱԾ)
Հասարակություն
12.03.2020 | 20:17
Factor.am-ի տեղեկություններով՝ Հայաստանում արձանագրվել է կորոնավիրուսով հիվանդացության ևս մեկ դեպք։ Վարակակիրը շփում է ունեցել Իտալիայից վերադարձած Էջմիածնի քաղաքացու հետ։ Նա մասնակցել է նշանադրության արարողության, որին նաև վարակակիրն է ներկա եղել։ Այսպիսով, սա Հայաստանում կորոնավիրուսի տարածման առաջին լոկալ դեպքն է։
Տեղեկությունը Առողջապահության նախարարությունից ճշտելու մեր բոլոր փորձերն ապարդյուն անցան: ԱՆ խոսնակ Ալինա Նիկողոսյանը մոտ մեկ ժամ առաջ մեզ հետ զրույցում ասաց, որ վերջին թեստի պատասխանը ստացվել է մի քանի ժամ առաջ, այն բացասական է եղել: Դրանից հետո խոսնակից ավելի թարմ տեղեկություն ստանալու նպատակով մեր բոլոր հեռախոսազանգերը մնացին անպատասխան:
Նշենք՝ այսօր հայտնի դարձավ, որ հայտնաբերված երեք վարակակրից մեկն Էջմիածնի քաղաքացի է։ Լուրը ֆեյսբուքյան ուղիղ եթերի միջոցով հաստատեց Էջմիածնի քաղաքապետ Դիանա Գասպարյանը։ Առավոտյան էլ շտապօգնության մեծաթիվ մեքենաներով մեկուսացվել են այն քաղաքացիները, որոնք վարակակրի հետ շփում են ունեցել։
Երեկ երեկոյան հայտնի դարձավ, որ Հայաստանում նոր տեսակի կորոնավիրուսի երեք նոր դեպք կա։ Վարչապետ Նիկոլ Փաշինյանի տեղեկացմամբ՝ վարակակիրներից երկուսը ՀՀ քաղաքացի են, երրորդը՝ Իտալիայի, որն աշխատում է Հայաստանում։
Առողջապահության նախարարությունից մեզ փոխանցված տվյալների համաձայն՝ Հայաստանում ընդհանուր թվով մեկուսացված է 57 քաղաքացի։ Նրանք գտնվում են Ծաղկաձորում։
Հ.Գ. Մեր հրապարակումից կարճ ժամանակ անց արդեն առողջապահության նախարար Արսեն Թորոսյանը հայտնեց կորոնավիրուսով վարակի 2 նոր դեպքի մասին:
Նելլի Մելքոնյան
