Զոհրաբ Մնացականյանի պատասխանը Թուրքիայի արտգործնախարարին շեշտակի էր. Իգիթյան. ՏԵՍԱՆՅՈՒԹ

ԱԺ «Իմ քայլը» խմբակցության պատգամավոր Հովհաննես Իգիթյանը դրական է գնահատում Արտաքին գործերի նախարար Զոհրաբ Մնացականյանի պատասխանը Թուրքիայի արտգործնախարարին։

«Զոհրաբ Մնացականյանի պատասխանը շեշտակի էր»,- այսօր խորհրդարանում ասաց նա։

Մինչդեռ, պատգամավորի խոսքով՝ ԵԱՀԿ Մինսկի խմբի համանախագահների կողմից այդ մասով արձագանք չեղավ։

Հիշեցնենք, որ Թուրքիայի արտգործնախարար Մևլութ Չավուշօղլուն մարտի 2-ին հանդիպել էր ԵԱՀԿ Մինսկի խմբի համանախագահների հետ։ Հանդիպմանը ներկա էին եղել համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շեֆերը (ԱՄՆ) և ԵԱՀԿ նախագահի անձնական ներկայացուցիչ Անջեյ Կասպշիկը:

Թուրք պաշտոնյան հանդիպման ժամանակ ասել էր, որ Մինսկի խումբը պետք է բարձրացնի ղարաբաղյան հակամարտության կարգավորման ուղղությամբ աշխատանքի արդյունավետությունը։ Հանդիպումից հետո Չավուշօղլուն Twitter-ի իր միկրոբլոգում գրել էր, որ ԵԱՀԿ ՄԽ–ի  որոշումը պետք է հիմնված լինի Ադրբեջանի տարածքային ամբողջականության, ինքնիշխանության և միջազգայնորեն ճանաչված սահմանները հարգելու սկզբունքների վրա։

Արձագանքելով Չավուշօղլուի հայտարարությանը` ՀՀ արտգործնախարար Զոհրաբ Մնացականյանը Twitter–ում գրել էր, որ Թուրքիայի ԱԳ նախարար Մևլութ Չավուշօղլուի՝ ԼՂ հակամարտության վերաբերյալ ԵԱՀԿ Մինսկի խմբի համանախագահներին տրվող խորհուրդն իրեն հիշեցրել է Ղուկասի ավետարանի հետևյալ խոսքերը. «Բժի՛շկ, բժշկեա՛ զանձն քո»:

Մանրամասները՝ տեսանյութում:

Մերի Մարտիրոսյան