Հրայր Թովմասյանին և ՍԴ 6 անդամներին փոխարինողներին իշխանությունները ցանկանում են ընտրել արագացված ռեժիմով. նոր նախագիծ

Իշխանությունները ցանկանում են արագացնել Սահմանադրական դատարանի դատավորների ընտրության գործընթացը: ԱԺ «Իմ քայլը» խմբակցության պատգամավոր Վահագն Հովակիմյանն առաջարկում է փոփոխություն կատարել ԱԺ կանոնակարգ սահմանադրական օրենքում, որի համաձայն՝ ԱԴ դատավորի թափուր տեղերը համալրելու հարցը կքննարկեն ոչ  միայն հերթական, այլ նաև արտահերթ նիստերի ժամանակ:

Նախագծի հիմնավորման մեջ նշվում է, որ Ազգային ժողովի կանոնակարգ սահմանադրական օրենքով Սահմանադրական դատարանի դատավորի ընտրության նախատեսված կարգավորումներն այնպիսին են, որ դրանք արհեստականորեն ձգձգում են գործընթացը: «Մասնավորապես, դատավորի հրաժարականի դեպքում, եթե դա տեղի ունենա գարնանային նստաշրջանի վերջում, օրինակ՝ մայիսին, ՍԴ դատավորի թեկնածու առաջադրող՝ Սահմանադրությամբ նախատեսված մարմինն էլ կկատարի իր պարտավորությունը, միևնույն է «Ազգային ժողովի կանոնակարգ» սահմանադրական օրենքի առկա կարգավորման պատճառով ՍԴ դատավորի տեղը թափուր կմնա ավելի քան չորս ամիս: Այս փոփոխության նպատակն է «Ազգային ժողովի կանոնակարգ» սահմանադրական օրենքով խորհրդարանին հնարավորություն տալ, որպեսզի անհրաժեշտության դեպքում ՍԴ դատավորի ընտրությունները կազմակերպվեն նաև արտահերթ նիստում: Այսպիսով,  դատավորի թափուր տեղի համալրման գործընթացը չի ձգձգվի՝ զուտ ձևական կարգավորումներով պայմանավորված»,- նշված է նախագծում:

Առաջիկայում նախատեսված է սահմանադրական փոփոխությունների հանրաքվե, որով առաջարկվում է ՍԴ նախագահի և վեց դատավորների լիազորությունները կասեցնել: Ըստ ամենայնի՝ իշխանությունները նման օրենսդրական փոփոխություններ են նախաձեռնում հանրաքվեից հետո արագացված կարգով ՍԴ նոր դատավորներ ընտրելու համար:

Նարեկ Կիրակոսյան