15.10.2026 | 12:00
ՀԷՑ-ը դառնում է պետական, կառավարման ենք հանձնելու թոփ ընկերության, չենք մասնավորեցնելու. Փաշինյան․ ՏԵՍԱՆՅՈՒԹ
Մարգարիտա Խաչատրյան (Մառոզ). «Տարկետման վերացումը կարող է կոռուպցիայի աղբյուր դառնալ». «Փաստ»
26.10.2017 | 09:33
«Փաստ» օրաթերթը գրում է.
Պաշտպանության նախարարության կողմից ներկայացված տարկետման իրավունքը վերացնող օրենսդրական նախագիծը քննադատողների և այն խրախուսողների քննարկումները դեռ շարունակվում են:
Նշենք, որ օրենսդրական այս փոփոխությամբ տարկետում կստանան միայն Հայաստանի բուհերում կրթություն ստացող այն քաղաքացիները, որոնք ուսումնառության ընթացքում ռազմական պատրաստություն անցնելու և ուսումն ավարտելուց հետո ՊՆ–ի նշած վայրում ու պայմաններով ծառայելու վերաբերյալ պայմանագիր կկնքեն:
Մի շարք ուսանողներ ևս իրենց բացասական դիրքորոշումն են հայտնել օրենքի նախագծի վերաբերյալ: Նրանք պահանջում են, որ տարկետման իրավունքն անպայման գործի:
«Զինվոր» հասարակական խորհրդի նախագահ Մարգարիտա Խաչատրյանն այն կարծիքին չէ, որ տարկետման իրավունքը վերացնելը գիտության զարգացման համար խոչընդոտ կհանդիսանա:
«Չեմ կարծում, թե գիտելիքը կտուժի: Ինչ պարտադիր է, որ երիտասարդն ուսումը տարկետումով շարունակի, հետո նոր գնա ծառայության: Բազմաթիվ զինծառայողներ ունենք, որոնք բարձրագույն կրթություն ստանալուց և բուհն ավարտելուց հետո զորակոչի չեն գալիս, այլ արտերկրում աշխատանքի են անցնում»,– «Փաստ»–ի հետ զրույցում ասաց Մարգարիտա Խաչատրյանը:
Վերջինս նշեց, որ այս ընթացքում բազմաթիվ ուսանողների հետ հանդիպումներ է ունեցել:
«Երիտասարդների մոտ մտավախություն կա, որ իրենց ուսումը կտուժի: Նրանք հանդիպումների ժամանակ հայտարարում են, որ տարկետում պետք է լինի, որից հետո միայն կմեկնեն ծառայության: Միանում եմ իրենց մտահոգությանը, բայց ես այլ ռիսկեր եմ տեսնում: Վախի զգացում ունեմ, որ փոփոխությունը նորից կարող է կոռուպցիայի աղբյուր դառնալ, կոռուպցիան ավելի կշատանա, չծառայողը չի ծառայի, տարկետում չունեցողն էլ՝ ամեն դեպքում կունենա այն»,–ընդգծեց մեր զրուցակիցը:
Ըստ Մարգարիտա Խաչատրյանի՝ հավասարության սկզբունքը ևս չի գործելու:
«Եթե երիտասարդը հասել է անվճար ուսման, կրթաթոշակ է ստանում, ապա ամեն քայլի կգնա, որ ծառայության չմեկնի: Եթե օրենքն ընդունվի, կընդունվի խեղճի ու անճարի համար: Ես կգերադասեի նախ հավասարության մթնոլորտ լիներ համակարգում, որից հետո միայն որոշում կայացվեր տարկետումը վերացնելու վերաբերյալ: Մենք ցավալի դեպքեր ենք ունենում: Ես յուրաքանչյուր հուղարկավորության ժամանակ տեսնում եմ, թե որ ընտանիքներն են կորուստներ ունենում»,– հավելեց «Զինվոր» հասարակական խորհրդի նախագահը:
Ինչ վերաբերում է հավասարություն ստեղծելու հնարավորությանը, Մարգարիտա Խաչատրյանն այդ առումով լավատես է:
«Մեկ տարվա ընթացքում ունենք հետևյալ պատկերը. Պաշտպանության նախարար Վիգեն Սարգսյանն ուզում է հասնել հավասարության: Մենք դեկտեմբերի 4–ին հանդիպում ունենք նախարարի հետ: Հուսով եմ՝ նրա կողմից բոլոր հիմնավորումները կտրվեն, որպեսզի ինքս համոզվեմ, որ կոռուպցիան բանակից վերացնելու համար ամեն ինչ արվում է»,– ընդգծեց մեր զրուցակիցը:
Մանրամասները՝ թերթի այսօրվա համարում:
