11.02.2026 | 23:36
Քարաթափումներ Երևան-Մեղրի ավտոճանապարհին. վնասվել են ավտոմեքենաներ
Մեծ Բրիտանիան պաշտոնապես դուրս եկավ Եվրամիության կազմից
Քաղաքականություն
01.02.2020 | 11:05
Մեծ Բրիտանիան այսօր Լոնդոնի ժամանակով ժամը 23:00-ին (Երևանի ժամանակով փետրվարի 1-ի՝ ժամը՝ 03:00 ) պաշտոնապես դուրս եկավ Եվրամիության կազմից. գրում է РИА Новости-ն:
Երկիրը միության կազմում էր 47 տարի, բայց լիարժեք ինտեգրում Եվրոպային այդպես էլ տեղի չունեցավ. Միացյալ Թագավորությունը պահեց իր արժույթը և չմտավ Շենգեն գոտի:
Մեծ Բրիտանիայի վարչապետ Բորիս Ջոնսոնը միությունը լքելուց մեկ ժամ առաջ արված իր ուղերձում ևս մեկ անգամ թվարկել է կառավարության առաջնահերթությունները:
«Խոսքը փոփոխություններ կատարելու համար նոր հնարավորություններից օգտվելու մասին է, որի համար էլ քվեարկել է ժողովուրդը՝ լինի դա ներգաղթը վերահսկելու, մեր ձկնորսական արդյունաբերության կամ ազատ առևտրի պայմանագրեր կնքելու առումով, թե՝ պարզապես սեփական օրենքները ստեղծելու, սա արվում է` ի շահ այս երկրի ժողովրդի», – ասել է նա:
Կառավարության ղեկավարը նշել է, որ իր բոլոր ուժեղ կողմերով հանդերձ ԵՄ-ն 50 տարի շարժվել է այն ուղղությամբ, որն այլևս հարմար չէ Մեծ Բրիտանիային:
«Եկել է այն պահը, երբ մենք իսկապես կարող ենք միավորվել և բարձրացնել մեր մակարդակը. վերափոխենք Առողջապահության ազգային ծառայությունը, կատարելագործենք կրթական համակարգը և օգտագործելով լավագույն տեխնոլոգիաները մեր ենթակառուցվածքներն այնպես զարգացնենք, որ ամենանշանակալի վերածնունդը լինի Վիկտորյական դարաշրջանից սկսած», – ասել է Ջոնսոնը:
«Թեև մենք ցավում ենք, որ Մեծ Բրիտանիան հեռանում է, սակայն լիովին հարգում ենք այս որոշումն ու պատրաստ ենք շարժվել առաջ»,- ասված է Եվրամիությանը հայտարարությունում:
Առանցքային փոփոխություններ այժմ տեղի չեն ունենա, քանի որ մինչև 2020 թվականի դեկտեմբերի 31-ը գործելու է անցումային շրջանը: Եվրամիության օրենքների մեծ մասը կշարունակի գործել Միացյալ Թագավարությունում, մինչև Բրիտանիան համաձայնեցնի Եվրամիության հետ առևտրային համաձայնագիրը:
