ԵԽԽՎ-ում անհանգստացած են վարչապետի գրասենյակի և ՍԴ-ի միջև լարվածությունից

ԵԽԽՎ մոնիթորինգի հանձնաժողովի համազեկուցողներն անհանգստություն են հայտնել Հայաստանի երկու պետական ​​ինստիտուտների ՝ Վարչապետի գրասենյակի և Սահմանադրական դատարանի նախագահության միջև լարվածության բարձր մակարդակից: Այս մասին տեղեկանում ենք ԵԽԽՎ կայքից:

«Հավասարակշռությունն անհրաժեշտ է ցանկացած ժողովրդավարական համակարգում: Սա ենթադրում է, որ բոլոր ինստիտուցիոնալ ուժերը պետք է գործեն համաձայն օրենքի գերակայության, և հարգեն այն իրենց գործերով ու խոսքով՝ ներառյալ անմեղության կանխավարկածի սկզբունքը: Եթե ​​նրանք չեն կարողանում համագործակցել սկզբունքների շրջանակում, ապա քայքայում և վնասում են միմյանց: Ուստի մենք անհանգստացած ենք աննախադեպ մակարդակի հասած այս լարվածության երկարատև վնասով, որը կարող է ազդել դատական համակարգի վրա, ընդհանուր առմամբ, որի նկատմամբ վստահությունն առանց այդ էլ ցածր է:

Հայաստանի Կառավարությունն ու Խորհրդարանը մինչ այժմ հարգել են իրավիճակը կարգավորելու իրավական ընթացակարգերը: Ավելին, իշխանությունները խնդրել են Վենետիկի հանձնաժողովի կարծիքը՝ Սահմանադրական դատարանի դատավորների վաղաժամկետ կենսաթոշակի անցնելու մեխանիզմի վերաբերյալ: Համաձայն եվրոպական չափանիշների ՝ Վենետիկի հանձնաժողովն ընդգծել է, որ վաղաժամկետ կենսաթոշակները պետք է լինեն խիստ կամավոր, և որ այդ սկզբունքը պետք է դիտարկվի: Որպես համազեկուցողներ՝ մենք ուշադիր մշտադիտարկում կանցկացնեք, որպեսզի Հայաստանի իշխանությունները շարունակեն գործել այս կերպ, եթե նույնիսկ այս մեխանիզմի նպատակը, որը միտված է 2015 թվականի սահմանադրական փոփոխությունների ոգին պահպանելուն, տեղին է:

Մենք արդեն ընդգծել ենք, որ քաղաքական դերակատարները պետք է զերծ մնան այնպիսի գործողություններից ու հայտարարություններից, որոնք կարող են ընկալվել որպես դատական համակարգի նկատմամբ ճնշում: Բացի այդ, մենք կոչ ենք անում բոլոր կողմերին նվազեցնել լարվածությունը: Վերջապես, այդ լարվածությունը չպետք է ստվեր գցի Հայաստանում իրականացվող բարեփոխումների անհրաժեշտության վրա»,- նշվում է հայտարարության մեջ:

Թարգմանությունը՝ Նելլի Մելքոնյանի