08.12.2025 | 15:55
Վարդենիսում զինծառայող է մահացել․ ՀՀ ՊՆ
Պետք է հասկանալ՝ ում է ձեռնտու Կուտոյանի մահը․ Նորայր Նորիկյան
Քաղաքականություն
17.01.2020 | 16:11
Այսօր Քննչական կոմիտեն հայտնեց, որ հայտնաբերվել է ԱԱԾ նախկին տնօրեն Գեորգի Կուտոյանի դին՝ հրազենային վիրավորումով։
Փաստաբան Նորայր Նորիկյանը Factor.am-ի հետ զրույցում ասաց, որ սա ողբերգություն է, որի բոլոր հնարավոր պատճառները իրավապահների կողմից պիտի քննության առնվեն:
«Բնականաբար, Գեորգի Կուտոյանի վերաբերյալ տարածված հաղորդագրությունը բավականին լուրջ է՝ հաշվի առնելով, որ նա ոչ միայն երիտասարդ էր, այլ նաև շատ պատասխանատու պաշտոն էր զբաղեցնում։ Իրավապահ մարմինները պետք է քննություն կատարեն՝ պարզելու համար այս ողբերգության բոլոր հանգամանքները։ Հանրության մոտ առաջանում են հարցեր, թե, այնուամենայնիվ, ինչն է հանդիսացել շարժառիթ, դրդապատճառ նման ողբերգության համար, նույնիսկ եթե վերջնական հանգենք այն հետևության որ սա ինքնասպանություն է»,- ասաց Նորիկյանը։
Փաստաբանը հավելեց, որ այն ահռելի ինֆորմացիան, որին տիրապետում էր Կուտոյանը քչերին է հայտնի եղել․ «Ես վստահ եմ, որ Կուտոյանը տիրապետել է ահռելի տեղեկատվության, և որևէ սցենար հիմա չեմ բացառում։ Սա այնպիսի իրավիճակ է, որ պետք չէ շատ շրջանակներ փնտրել, Կոտոյանի աշխատանքի առանձնահատկությունը այն էր, որ նրա կողմից տիրապետվող տեղեկությունների շրջանակը կարող էին իմանալ սահմանափակ թվով մարդիկ։ Ինձ համար տարակուսելի է, թե այս քայլով ի՞նչ հետքեր են վերացվում, ո՞ւմ կողմից են վերացվում և ի՞նչ նպատակով: Ի վերջո պետք է հասկանալ՝ ո՞ւմ է սա ձեռնտու»։
Լիլիթ Շաբոյան
