Իրանում զանգվածային հակակառավարական ցույցեր են. պահանջում են պատժել կործանված օդանավի պատասխանատուներին

Իրանում զանգվածային հակակառավարական ցույցեր են մեկնարկել: Պատճառը Թեհրանի մերձակայքում կործանված ուկրաինական Boeing 737 օդանավն է: Այս մասին հայտում է Lenta.ru-ն:

«Միլիտարիստ» տելեգրամյան ալիքում հրապարակված տեսանյութում երևում է, թե ինչպես են հարյուրավոր մարդիկ Թեհրանի կենտրոնում երթ իրականացնում: Ակտիվիստները պահանջում են պատժել օդանավի կործանման պատասխանատուներին: Ակցիաներն անցկացվում են «Հրաժարականը բավարար չէ, անհրաժեշտ է քրեական հետապնդում» կարգախոսի ներքո:

Սոցցանցերում հրապարակում են նաև տեսանյութեր, որտեղ երևում է՝ ինչպես են իրանցի իրավապահները հատուկ նշանակության ուժերին կենտրոնացնում՝ հավանաբար պատրաստվելով ցրել ցույցերը:

Հիշեցնենք, որ հունվարի 8-ին Թեհրանի մերձակայքում, թռիչքից ընդամենը րոպեներ անց, կործանվել էր ուկրաինական Boeing-737 օդանավը: Արդյունքում զոհվել էր 167 ուղևոր և անձնակազմի 9 անդամ: Ավելի ուշ առաջ էր քաշվել այն վարկածը, որ օդանավը սխալմամբ խոցվել է իրանական հրթիռի կողմից: Սկզբում այս վարկածն Իրանի կողմից հերքվեց, սակայն այսօր առավոտյան Իրանի նախագահ Հասան Ռոհանին հայտարարեց, որ ուկրաինական օդանավի կործանման պատճառն իսկապես իրանական հրթիռն է եղել:

Ռոհանին իր ցավակցական խոսքում նշել էր. «Գեներալ Ղասեմ Սոլեյմանիի նահատակվելուց հետո, ամերիկյան ագրեսոր ռեժիմի կողմից սպառնալիքների և իրանցի ժողովրդին ահաբեկելու պայմաններում Միացյալ Նահանգների կողմից հնարավոր հարձակումներից պաշտպանվելու նպատակով Իրանի զինված ուժերը 100 տոկոսանոց մարտական պատրաստության էին բերվել: Ցավոք, մարդկային գործոնը և սխալ արձակումը հանգեցրին մեծ աղետի, ինչը ցավալի է: Որպես Իրանի նախագահ` ես ցավակցություններս եմ հայտնում այս ողբերգական աղետի զոհերի ընտանիքներին»: