15.11.2024 | 10:30
NYMEX. թանկարժեք մետաղների գներն աճել են
TheTravel-ը ճամփորդասերներին առաջարկում է այցելել «Զորաց քարեր»
Մշակույթ
11.01.2020 | 17:17
Ճամփորդական TheTravel կայքն ընթերցողներին առաջարկել է ճանապարհորդության հետաքրքրիր ուղղություններ. կայքն առանձնացրել է 20 տեսարժան վայրեր ամբողջ աշխարհից, որոնք, ըստ կայքի, ավելի հին են, քան Սթոունհենջը: Հոդվածագրի աչքից չի վրիպել նաև Հայաստանի «Զորաց քարեր» պատմամշակութային արգելոցը:
«Արմենպրես»-ի հաղորդմամբ՝ հոդվածագիրը նկատել է՝ շատ հին քարերը բավականին տարածված են, բայց Զորաց քարերի ատամնավոր եզրերը այն դարձնում են շատ ավելի իսկական: Հայաստանի շքեղ ամառային տեսարանը նման վայրերը դարձնում է էլ ավելի գրավիչ՝ ճամփորդությունը պլանավորելիս:
«Բնօրրան» պատմամշակութային հասարակական կազմակերպությունը, ՀՀ ԳԱԱ Հնագիտության և ազգագրության ինստիտուտը, որոնք երկար տարիներ իրարամերժ կարծիքներ են ունեցել Քարահունջ պատմամշակութային արգելոցի վերաբերյալ, համաձայնագիր են ստորագրել` որոշելով համատեղել ուժերը և պարզել Քարահունջն իրականում աստղադիտարա՞ն է, թե՞ հնավայր, բնակավայր, որն ունի դամբարանի կարգավիճակ:
Քարահունջը (Զորաց քարեր, Քարենիշ), նախապատմական մեգալիթյան կառույց է: Այն «Զորաց քարեր բնակատեղի» անունը կրող պատմամշակութային արգելոց և պետության կողմից պահպանվող հատուկ տարածք է: Մի շարք գիտնականներ և հետազոտողներ պնդում են, որ մեգալիթյան կառույցը աստղադիտարան է: Գիտական և սիրողական որոշ շրջանակներ մերժում են աստղադիտարան լինելու հանգամանքը և պնդում, որ այն դամբարանաշերտ է:
Մեգալիթյան կառույցի անվան և նշանակության մասին առկա հակասական կարծիքներն ու պնդումները հաճախ վերածվում են վեճերի ինչպես գիտական, այնպես էլ հասարակական շրջանակների միջև:
