«ԱԻՆ մասնագետները մտածում են՝ «Դալմա մոլի» ցնցումը մարդկային գործոնի հետևանք է». խոսնակ

Արտակարգ իրավիճակների նախարարության մասնագետները դեռ չեն պարզել, թե երեկ «Դալմա Գարդեն Մոլում» ինչի հետևանքով է տեղի ունեցել ցնցումը։

ԱԻՆ սարքավորումները շարունակում են տեղադրված մնալ կառույցի ներսում, որպեսզի, եթե նորից ցնցում գրանցվի, արձանագրեն պատճառները։ Այս մասին Factor.am-ի հետ զրույցում ասաց կառույցի մամուլի պատասխանատու Էդմոնդ Զարգարյանը։

Հիշեցնենք, որ երեկ երեկոյան կես ժամ շարունակ ցնցվել էր առևտրի կենտրոնի երկրորդ հարկի մի հատվածը: Համացանցում տեղեկություններ տարածվեցին, որ դա երկրաշարժի հետևանք է, ինչը, սակայն, ԱԻՆ-ը հերքեց:

«Մեր մասնագետները մտածում են, որ դա մարդու գործոնի հետևանք է: Կարող ա ինչ-որ թրթուրավոր մեքենա է անցել, կարող ա պատերին են խփել կամ օդորակիչները միաժամանակ միացնել անջատել են: Նման գործողությունների ժամանակ լինում են նման դեպքեր: Այդ սարքավորումներն այսօր ամբողջ օրը կմինան, եթե կլինի նմանատիպ կրկնություն, կհասկանանք պատճառները և կանխարգելիչ միջոցառումներ կկազմակերպենք»,- ասաց նա:

Հստակեցնող հարցին՝ այսինքն, եթե ցնցումը չկրկնվի, ապա հայտնի չի լինի, թե ինչն է եղել նախկին ցնցման պատճառը, ԱԻՆ մամուլի խոսնակն ասաց. «Այդ նպատակով աշխատանքներ տարվում են: Երբ աշխատանքներն ավարտվեն, կասենք, թե ինչ արդյունքներով ենք դրանք դադարեցնում»:

Նշենք, որ երեկ ժամը 19:00-ից առևտրի կենտրոնի աշխատանքները դադարեցված են: Մոլը չի աշխատի նաև այսօր: Երեկ մոլի ներսից ու հարակից տարածքներից տարհանել են քաղաքացիներին և ավտոմեքենաները: Դեպքի հետևանքով մարդկային ու նյութական կորուստներ չեն եղել:

Նարեկ Կիրակոսյան