Ես ինձ համարում եմ հեղափոխության շահառու. Ստյոպա Սաֆարյան. ՏԵՍԱՆՅՈՒԹ

Հայաստանի Կառավարությունն այսօր միաձայն քվեարկությամբ քաղաքագետ Ստյոպա Սաֆարյանին նշանակեց Հանրային խորհրդի նախագահ: Սաֆարյանը խոստացավ հանրության ձայնը հասցնել Կառավարությանը և օգտակար լինել խորհուրդներով:

Նիստից հետո լրագրողների հետ զրույցում նա տեղեկացրեց՝ նախնական զրույց ունեցել են վարչապետ Նիկոլ Փաշինյանի հետ: Նա նշեց, որ նախանշած հիմնական ուղղություններն օրենսդրական փոփոխություններն են, այդ թվում՝ «Հանրային խորհրդի մասին» օրենքի փոփոխությունը, որը կենթադրի կանոնադրության և այլ ենթաօրենսդրական ակտերի փոփոխություն:

Ստյոպա Սաֆարյանն ասաց՝ Հանրային խորհրդի առջև դրված են խնդիրներ, թվարկված են և՛ առաքելությունը, և՛ գործիքները, որոնց միջոցով իրականացնելու է այդ առաքելությունը, բայց շատ հարցեր անորոշ են: Նա վստահեցրեց՝ որևէ մեկին Հանրային խորհրդից հեռացնելու նպատակ չի ունեցել:

«Ես այդպիսի ջանք չեմ ունեցել, համաձայնելով Հանրային խորհրդի անդամ դառնալ դեռ տարեսկզբին՝ մեկ ցանկություն եմ ունեցել, շնորհակալ եմ եղել, որ գնահատվել են իմ փորձագիտական հմտություններն անվտանգության և այլ ոլորտներում»,- ասաց նա:

Խոսելով նոր պաշտոնի մասին՝ Սաֆարյանը շեշտեց, որ Հանրային խորհրդի նախագահ դառնալն իր մանկության երազանքը չի եղել, ինքը որևէ մեկի հեռացմամբ շահագրգռված չի եղել: Հայտարարեց նաև, որ մինչև չորս-հինգ օր առաջ, երբ անակնկալ առաջակ եղավ զրուցելու վարչապետի հետ, որևէ կերպ իր մտքով չի անցել, որ սա այն կարգավիճակն էր, որն ինքը կցանկանար զբաղեցնել: Ստյոպա Սաֆարյանը խոստացավ՝ ֆեյսբուքում կշարունակի ակտիվ լինել, ասելիքը չի փոխվի:

«Պաշտոնը, գուցե, ստիպի վերաձևակերպել ասելիքս, բայց ոչ բովանդակությունը, իմ մտքերում և աշխարհաճանաչողության մեջ որևէ փոփոխություն տեղի չի ունեցել: Անշուշտ, արտահայտչամիջոցների փոփոխություն կլինի, եթե նախկինում որպես քաղաքացի Ստեփան Սաֆարյան էի հանդես գալիս, այժմ ընկալվելու եմ որպես Հանրային խորհրդի նախագահ»,- ասաց Սաֆարյանը:

Մանրամասները՝ տեսանյութում։

Նարեկ Կիրակոսյան