Ո՞նց կարելի է ՀՖՖ անդամների հեռացումն ու ընտրությունը նույն օրը դնել, դնողները լավ չեն պատկերացնում, թե ինչ են արել. Արման Սահակյան. ՏԵՍԱՆՅՈՒԹ

Գլխավոր հարցն այն չէ, թե ով կընտրվի ՀՖՖ նախագահ, այլ այն, թե ինչպես կանցնեն ընտրությունները: Այս մասին Factor.am-ի հետ զրույցում ասաց «Շիրակ» ֆուտբոլային ակումբի նախագահ Արման Սահակյանը:

«Ֆեդերացիան որոշեց գնալ ընտրությունների՝ առանց ցուցակները զտելու: Իսկ ֆեյք ՀԿ-ներին փորձելու են հանել ընտրություններից րոպեներ առաջ, որն ինձ համար շատ մեծ հարցական է՝ կստացվի՞, թե՝ ոչ»,- ասաց նա:

Արման Սահակյանն անդրադառնալով նախորդ շաբաթ ՀՖՖ անդամ համարվող յոթ ՀԿ-ների անդամակցության կասեցմանը, նշեց, որ դա չի կարող համարվել ֆեյքերի զտում. «Կասեցումն առ ոչինչ է, պետք է քվեարկություն լինի, որ կարողանան այդ կազմակերպություններին հանել: Ես խորը կասկածներ ունեմ, որ ֆեյքերին կհանեն, ֆեյքերն այնքան շատ են, որ քվեարկությունը լավ չեմ պատկերացնում: ՀԿ-ների մի մասը միտումնավոր գրանցվել է ՀՖՖ-ում, որ ընտրությունների վրա ազդեցություն ունենա: Դրանք ոչ մի բանով չեն զբաղվում, բայց պատրաստվում են որոշել ֆուտբոլի ապագան, որը խայտառակություն է»:

Արման Սահակյանը կարծում է, որ թե՛ Ռուբեն Հայրապետյանի, թե՛ Արթուր Վանեցյանի օրոք հայկական ֆուտբոլը որոշակի հաջողություններ ունեցել է: «Շիրակ» ֆուտբոլային ակումբի ղեկավարը զարմանալի է համարում այն, որ գործկոմի անդամների հեռացումը և նորերի ընտրությունը լինելու է նույն օրում. «Մեր ֆունդամենտը ծուռ է և փորձում են ընտրություն անել: Զարմանում եմ՝ ոնց կարելի է անդամների հեռացումն ու ընտրությունը դնել նույն օրը, դնողները լավ չեն պատկերացնում, թե ինչ են արել»:

Մանրամասները՝ տեսանյութում:

Նարեկ Կիրակոսյան