Կարտոֆիլի գինը կտրուկ բարձրացել է. «Փաստ»

«Փաստ» օրաթերթը գրում է.

Կարտոֆիլի բերքահավաքի 70%–ն արդեն ավարտված է Շիրակի մարզի Գետք համայնքում: Գյուղացին, սակայն, գոհ չէ բերքի քանակից:

«Խոշոր կարտոֆիլը քիչ է: Բերքի մոտ 60%–ը մանր է, որը վաճառքի ենթակա չէ, կարող ենք միայն անասնակեր դարձնել»,– «Փաստ» օրաթերթի թղթակցի հետ զրույցում տեղեկացրին Գետք համայնքի բնակիչները:

Իսկ կարտոֆիլի բերքն այս տարի Գետքում լավը չէ՝ երաշտի պատճառով:

«Երաշտ եղավ, բերքը չկարողացավ մեծանալ: Էնքան շոգ էր, որ կարտոֆիլը հողում թոշնեց»,– ասացին նրանք:

Գետքում կարտոֆիլի ցանքատարածություններն այս տարի պակասել են:

Այստեղ միայն 28 հեկտար են կարտոֆիլ ցանել: Նախորդ տարի կարտոֆիլի ցանքատարածությունն այս համայնքում 43 հեկտար էր զբաղեցրել: Գետքի բնակիչները կարտոֆիլ քիչ են ցանել իրացման պատճառով:

«Նախորդ տարի աշնանը գյուղացիները չկարողացան կարտոֆիլը ռեալիզացնել: Կարտոֆիլի կիլոն 50–60 դրամ էր, մարդիկ չկարողացան ծախել, հիասթափվեցին ու այս տարի էլ չմշակեցին»,– պատմեցին հողագործները:

Չկարողանալով բերքն իրացնել՝ Գետքի բնակիչները մնացին բանկերին պարտք: Շուրջ 60 տնտեսություն «սև» ցուցակում էին հայտնվել: Համայնքի մի մասը խրվել է վարկային պարտավորությունների մեջ:

Դեռևս անցյալ տարի գյուղատնտեսական աշխատանքներ կատարելու համար նրանք վարկեր են վերցրել, բայց չեն կարողացել վարկերը մարել: Այս տարի էլ հույս չունեն, որ կմարեն՝ բերքն է քիչ:

Բերքի պակասն ու ցածր բերքատվությունն ազդել են գնի վրա: Այսօր Շիրակի մարզում անմիջապես դաշտից գյուղացին մեկ կիլոգրամ կարտոֆիլը 140–150 դրամով է վաճառում:

Ազատան համայնքի ֆերմեր Գևորգ Աբրահամյանը երեկ 140 դրամով է կարտոֆիլը վաճառել: Նրա խոսքով՝ գինն այդքան էլ բարձր չէ՝ հաշվի առնելով ներդրած ծախսերը:

«600–700 դրամով սերմացուն ենք գնում ու 140 դրամով բերք վաճառում: Ինքնարժեքն է դա: Եթե ուզում եք, որ Հայաստանում տնտեսություն զարգանա, ապա 140–ից ցածր պետք է կարտոֆիլ չվաճառվի, հակառակ դեպքում՝ ֆերմերը անեկամուտ կաշխատի»,– նշեց ֆերմերը:

Ի տարբերության տեղական շուկայում սահմանված գնի՝ կարտոֆիլն այստեղից 130 դրամով է արտահանվել: Վրաստանում այս տարի նույնպես կարտոֆիլի բերքը քիչ է: Ֆերմեր Գևորգ Աբրահամյանի վրացի գործընկերն օրեր առաջ Ազատան է եկել և 50 տոննա կարտոֆիլ տարել:

«10 օր առաջ 130 դրամով է կարտոֆիլն արտահանվել, հիմա, որ գան, ավելի թանկ կտանեն: Շուկայում էլ 100–120 դրամ էր կարտոֆիլի գինը, այսօր մեծածախ գինն արդեն 150 դրամ է դարձել: Օրական շուկան ուրիշ գին է թելադրում»,– ասաց ֆերմերը: Ազատանում բերքի 20%–ն է առայժմ հողում մնացել:

Կարտոֆիլագործությամբ հայտնի Շիրակի մարզում նախորդ տարվա համեմատ այս տարի ցանքսը 600 հեկտարով նվազել է՝ իր հերթին փոխանցեց մարզի գյուղատնտեսության վարչության պետ Մովսես Մանուկյանը:

«Այս տարի մոտ 10000 տոննա բերք պակաս կլինի: Մտածում էինք, որ երաշտի պատճառով բերքը շատ պակաս կլինի, բայց այդքան էլ քիչ չէ»,– վստահեցրեց մարզի գլխավոր գյուղատնտեսը:

Նրա կանխատեսմամբ՝ կարտոֆլի գինը դեռ կբարձրանա՝ հատկապես ձմռան և գարնան շրջանում:

Շարունակությունը՝ «Փաստ» օրաթերթի այսօրվա համարում