Հայաստանում նշվում է բանկային աշխատակցի օրը. ՀՀ ԿԲ նախագահ  Արթուր Ջավադյանը  շնորհավորական ուղերձ է հղել

Հայաստանում 26 տարի առաջ՝ 1993 թ. նոյեմբերի 22-ից,  շրջանառության մեջ է դրվել ազգային  արժույթը՝ դրամը։ Ինչն էլ առիթ է հանդիսացել, որպեսզի  երկրում  ամեն տարի նոյեմբերի 22-ին նշվի  բանկային աշխատողի  ու դրամի տոնը։ Այդ օրվանից, որպես օրինական վճարամիջոց, սկսում են շրջանառվել 10, 25, 50, 100, 200 և 500 դրամ անվանական արժեքով թղթադրամները: Իսկ փոխանակման համար ընդունվում է 1 դրամ = 200 ռուբլի հարաբերակցությունը:

Մինչև 1994 թ. մարտի 17-ը ժամանակավոր շրջանառության մեջ են գտնվում նաև Խորհրդային Միության 1961-1992 թթ. նմուշների 1-ից մինչև 500 ռուբլի անվանական արժեքով թղթադրամները:

1994-1995 թթ.  շրջանառության մեջ են դրվում առաջին շարքի ալյումինե 10, 20, 50 լումա և 1, 3, 5, 10 դրամ մետաղադրամները, ինչպես նաև 1000 և 5000 դրամ արժողությամբ թղթադրամները:

1998 թ. սկսած թողարկվում են նաեւ  երկրորդ շարքի 50, 100, 500, 1000, 5000, 10000 և 20000 դրամ անվանական արժեքով թղթադրամները, որոնք իրենց ձևավորմամբ, պաշտպանվածությամբ և պատրաստման որակով համապատասխանում են ժամանակակից թղթադրամների տպագրության պահանջներին:

2001 թ. շրջանառության մեջ է դրվում 50000 դրամ անվանական արժեքով հոբելյանական թղթադրամը` նվիրված Հայաստանում քրիստոնեությունը պետական կրոն հռչակելու 1700-ամյակին:

Իսկ ահա 2003-2004 թթ.  սկսում են շրջանառվել  ՀՀ երկրորդ շարքի մետաղադրամները` 10, 20, 50, 100, 200 և 500 դրամ անվանական արժեքով:

2004-2005 թթ. շրջանառությունից դուրս են բերվում 1993-1995 թթ. նմուշի և 1998 թ. նմուշի 50 ու 100 դրամ անվանական արժեքով թղթադրամները: Դրանք դադարում են օրինական վճարամիջոց լինելուց, թեև փոխանակվում են ՀՀ կենտրոնանան բանկում և ՀՀ տարածքում գործող բանկերում իրենց անվանական արժեքով:

2009 թ.-ին թողարկվում է ամենաբարձր՝ 100.000 դրամ անվանական արժեքով թղթադրամը:

ՀՀ կենտրոնական բանկի նախագահ  Արթուր Ջավադյանը  շնորհավորական ուղերձ է հղել բանկային  ոլորտի  աշխատակիցներին՝ մասնագիտական տոնի կապակցությամբ, նշելով, որ վերջիններիս հետևողական աշխատանքի արդյունքն է ներկայիս կայացած բանկային համակարգն ու պետականության կարևորագույն խորհրդանիշներից հանդիսացող ազգային արժույթը:

«Նոյեմբերի 22-ն արդեն կայացած, ավանդույթներ թելադրող օր  է բանկային ոլորտի աշխատակիցների համար: Ուղիղ քսանվեց տարի առաջ ներդրված ազգային արժույթը շարունակում է բարձր վստահություն վայելել Հայաստանի Հանրապետության քաղաքացիների շրջանում:

Փաստ է նաև, որ ՀՀ բանկային համակարգը կայացած ինստիտուցիոնալ հանրույթ է, որը հպարտության զգացում է առաջացնում համակարգի բոլոր աշխատակիցների շրջանում։ Բանկային համակարգը տարիներ շարունակ դրսևորել է և, վստահ եմ, ապագայում էլ կդրսևորի բավարար ճկունություն հաղթահարելու աշխարհում տեղի ունեցող բոլոր այն մարտահրավերները, որ բխում են ինչպես թվային տեխնոլոգիաների զարգացումից, այնպես էլ համաշխարհային շուկաների փոխակերպումներից »,-նշված է շնորհավորական ուղերձում: