03.02.2026 | 17:45
Ֆրանսիայի ԱԺ-ում Ադրբեջանի կողմից Արցախի ղեկավարների ազատ արձակման վերաբերյալ բանաձև կներկայացվի
Գրադարանավարի օրվա առթիվ կիրականացվի «Կյանքը` գրքերով» ծրագիրը
Մշակույթ
04.10.2017 | 18:12
ՀՀ կառավարության որոշմամբ 2004 թվականից հոկտեմբերի 7-ը Հայաստանի Հանրապետությունում նշվում է որպես Գրադարանավարի օր:
Այս տարի ՀՀ մշակույթի նախարարությունը գրադարանավարի օրվա առթիվ իրականացնում է «Կյանքը` գրքերով» խորագիրը կրող ծրագիրը:
Ծրագրի նպատակն է ընդգծել գրքի, գիտելիքի, գրադարանների դերը, նպաստել ընթերցանության խթանմանը և գրադարանում հանրության համար առավել հրապուրիչ միջավայրի ձևավորմանը: Ծրագրին միացած 130 գրադարաններում նախատեսված են թվով 298 միջոցառում` վերջին տարիներին հրատարակված գրքերի շնորհանդեսներ, հանդիպումներ մարզերի, համայնքների ստեղծագործող հեղինակների հետ և նրանց աշխատանքների ցուցահանդես-վաճառքներ: Այդ օրը գրադարաններում կանցկացվեն նաև մեծարման ցերեկույթներ` նվիրված վաստակաշատ գրադարանավարներին: Այս տարի ծրագրին միացել են նաև Արցախի Հանրապետության քաղաքային ինը գրադարաններ:
Հոկտեմբերի 7-ին կկայանա «Կոմիտասի թանգարան-ինստիտուտ» ՊՈԱԿ-ի գրադարանային բաժնի բացման հանդիսավոր արարողությունը, որի ընթացքում նաև գրադարանային ոլորտի մի խումբ աշխատակիցներ ՀՀ մշակույթի նախարարության կողմից կպարգևատրվեն տարբեր պարգևներով:
