06.08.2026 | 22:30
«Անընդունելի և դատապարտելի է». Արամ Ա Կաթողիկոսը՝ Գարեգին Բ-ին դատարան կանչելու մասին
Ո՞վ է Գետափի 25-ամյա նորընտիր համայնքապետը և ի՞նչ ծրագրեր է պատրաստվում իրականացնել
Քաղաքականություն
02.10.2019 | 16:26
Սեպտեմբերի 29-ին Արագածոտնի, Արարատի, Արմավիրի, Գեղարքունիքի, Լոռու, Տավուշի ու Շիրակի մարզի մի շարք բնակավայրերում տեղական ինքնակառավարման մարմինների ընտրություններ անցկացվեցին։ Քննարկումների առիթ դարձավ հատկապես Շիրակի մարզի Գետափ համայնքի ղեկավարի պաշտոնում 25-ամյա Շիրակ Խաչատրյանի ընտրվելը: Նա դարձավ Հայաստանի ամենաերիտասարդ համայնքապետերից մեկը:
Գետափի 668 ընտրողից ընտրություններին մասնակցել է 430 բնակիչ, որից 197-ն քվեարկել է Շիրակ Խաչատրյանի օգտին։ Մյուս թեկնածուները՝ գյուղապետարանի աշխատակազմի քարտուղար Ձոնիկ Սարգսյանը՝ ստացել է 90, իսկ Հովհաննես Բաղդասարյանը՝ 133 քվե։
Factor.am-ի հետ զրույցում նորընտիր համայնքապետը նշեց, որ համագյուղացիները վստահել և իրենց քվեն են տվել, անկուսակցական է, ոչ մի քաղաքական ուժ չի աջակցել ընտրությունների ընթացքում։
«Ընտրություններին մասնակցելն իմ ընկերների, շրջապատի, համագյուղացիների ցանկությունն էր, մասնակցեցի ու ստացա քվեները»,- ասաց Շիրակ Խաչատրյանը։
Իսկ համացանցում ծավալված քննարկումներին, թե երիտասարդ է ու անփորձ, նորընտիր համայնքապետը պատասխանում է՝ բավարար կրթություն ունի՝ համայնքը ղեկավարելու համար։
«Ես նորմալ եմ ընդունում բոլոր մեկնաբանություններն ու քննարկումները։ Բնական է՝ երիտասարդ լինելը կարող է ինչ-որ տեղ խոչընդոտ հանդիսանալ, բայց չեմ կարծում, որովհետև ես իմ ուժերի ներածին չափով աշխատելու եմ հանուն համայնքի զարգացման։ Երիտասարդ լինելը չի խանգարի, իմ կարծիքով, քանի որ ունեմ նաև համապատասխան կրթություն»,- ասաց Շիրակ Խաչատրյանը՝ հավելելով , որ այժմ սովորում է ԳԱԱ-ում՝ «Կառավարում» մասնագիտությամբ։
«Ես սովորել եմ Հայկական պետական մանկավարժական համալսարանի Կուլտուրայի ֆակուլտետում՝ «Սոցիալ-մշակութային գործունեություն կառավարում» բաժնում, հետագայում մագիստրատուրան սովորել եմ Հայաստանի պետական տնտեսագիտական համալսարանի ֆինանսական ֆակուլտետի «Մաքսային վարչարարություն» բաժնում: Աշխատել եմ նաև մեր համայնքում, 3 տարի է՝ հանդիսանում եմ ավագանու անդամ»,- թվարկեց երիտասարդ համայնքապետը։
Ըստ Խաչատրյանի՝ հիմա առաջնայինը գյուղի՝ տարիներով կուտակված բազմաթիվ խնդիրները լուծումն է։
«Առաջնայինը գյուղում մանկապարտեզի խնդիրն է՝ չունենք մանկապարտեզ: Մի մասը երեխաներին տանում է կողքի գյուղի մանկապարտեզ, ովքեր հնարավորություն ունեն, ովքեր չունեն՝ չեն տանում։ Հետո արդեն համայնքային ճանապարհների, լուսավորության, ոռոգման ջրի, մշակույթի տան հիմնանորոգման խնդիրներն են։ Գյուղն ունի բազմաթիվ խնդիրներ, որոնք այս տարիներին լուծված չեն»,- ասաց երիտասարդ համայնքապետը: Նա, ի դեպ, պաշտոնը կստանձնի 40 օրից:
