11.07.2026 | 19:59
Մի՛ վնասեք ծառերն ու բուսականությունը, մի՛ անհանգստացրեք վայրի կենդանիներին. ՇՄՆ-ի կոչը
Պատգամավորն առաջարկել է Նիկոլ Փաշինյանի հետ հանդիպել, անկեղծ զրուցել
Քաղաքականություն
10.06.2019 | 21:32
Ազգային ժողովի «Իմ քայլը» խմբակցությունն առաջիկայում փակ հանդիպում է ունենալու վարչապետ Նիկոլ Փաշինյանի հետ: Նման առաջարկով խմբակցությունում հանդես է եկել պատգամավոր Էդգար Առաքելյանը:
Մեր աղբյուրների փոխանցմամբ՝ Էդգար Առաքելյանը Լիլիթ Մակունցին առաջարկել է, որ հանդիպումը հնարավորինս երկար տևի, քանի որ կուտակված հարցեր կան:
Factor.am-ի հետ զրույցում պատգամավոր Էդգար Առաքելյանն ասաց, որ դեռ պարզ չէ, թե հանդիպումը երբ տեղի կունենա վարչապետի հետ: Սակայն, նշեց, որ այն լուսաբանման համար փակ է լինելու. «Ընթացիկ հարցեր ենք քննարկելու, քանի որ տևական ժամանակ է՝ հանդիպում չենք ունեցել»:
Մեր դիտարկմանը, որ խորհրդարանական ձևաչափը հնարավորություն է տալիս, որպեսզի պատգամավորները վարչապետին հարցեր ուղղեն, արդյոք կառավարության հետ հարցուպատասխանը չի՞ բավարարում, Էդգար Առաքելյանն ասաց. «Չի բավարարում: Բազմաթիվ հարցեր կան, որոնք դուրս են մնում այդ ձևաչափից»:
Պատգամավորի փոխանցմամբ՝ վարչապետի հետ հանդիպման ժամանակ քննարկվելու են ընթացիկ քաղաքական հարցեր, ինչպես նաև անդրադարձ է կատարվելու կադրային քաղաքականությանը. «Այն, ինչ մենք խոսում ենք, կարող ենք դրա մասին պատմել, բայց բուն ֆորմատը պետք է փակ դռների հետևում լինի, որ անկեղծ խոսակցություն գնա»:
Հիշեցնենք՝ վերջին անգամ խորհրդարանում վարչապետ Նիկոլ Փաշինյանը «Իմ քայլը» խմբակցության հետ հանդիպել էր ապրիլի 8-ին:
Նարեկ Կիրակոսյան
