«Մշակութային վերածնունդ» փառատոնին կներկայացվի Հայաստանի մարզերի և Արցախի մշակույթը

«Նովոստի Արմենիա» մամուլի սրահում սեպտեմբերի 5-ին տեղի է ունեցել «Մշակութային վերածնունդ» խորագրով արվեստների և արհեստների համահայկական փառատոնին նվիրված ասուլիս:

Ասուլիսի բանախոսներն էին՝ ՀՀ տնտեսական զարգացման և ներդումների նախարարության Զբոսաշրջության պետական կոﬕտեի նախագահի առաջին տեղակալ Մեխակ Ապրեսյանը, Դիլիջանի քաղաքապետ Արմեն Սանթրոսյանը, Մշակույթի և տուրիզմի պրոպագանդման հիմնադրամի նախագահ Մարիամ Մինասյանը։

Ասուլիսի ընթացքում ներկայացվել են փառատոնի նպատակները, մասնակցության պայմանները և օրակարգը։

«Փառատոնները նպաստում են երկրի պետական քաղաքականության ﬕ շարք խնդիրների լուծմանը, համայնքներում զբոսաշրջության զարգացմանը: Դրանք զբոսաշրջիկների ուշադրությունը հրավիրում են դեպի գյուղական համայնքներ, ապահովում են տնտեսական ակտիվություն, հնարավորություն են տալիս համայնքներին ներկայացնելու իրենց կարողությունը` բացելով տնտեսական նոր հնարավորություններ», – իր խոսքում նշել է Մեխակ Ապրեսյանը։

Փառատոնի շրջանակներում ցուցադրվելու են գորգարվեստի բացառիկ, նույնիսկ թանգարանային նմուշներ, դեկորատիվ-կիրառական արվեստի ստեղծագործություններ` կավագործության, խեցեգործության, դարբնագործության, փայտագործության, ազգային խոհանոցի նմուշներ:

«Ներկայացվելու է ՀՀ մարզերի և Արցախի մշակույթը՝ երգ, պար, ազգային նվագարաններ, ինչպես նաև տարածաշրջանի զբոսաշրջային ներուժը: Նպատակային և գործնական աջակցություն է ցուցաբերվում նաև նշված բնագավառներում ստեղծագործող հայրենադարձներին՝ այդպիսով նրանց հնարավորություն ընձեռելով ցուցադրելու իրենց աշխատանքները, ճանաչելի դառնալու, գնահատվելու, ունենալու փորձի փոխանակման նոր միջավայր և վաճառելու իրենց աշխատանքները», – փառատոնի ծրագիրը ներկայացրել է Մշակույթի և տուրիզմի պրոպագանդման հիմնադրամի նախագահ Մարիամ Մինասյանը և հավելել, որ փառատոնին առանձնակի ձև ու բովանդակություն կհաղորդի դեֆիլեն՝ ազգային տարազների նոր ու ժամանակակից լուծումներով հանդերձանքների, աքսեսուարների ցուցադրումը։

Դիլիջանի քաղաքապետ Արմեն Սանթրոսյանն իր հերթին նկատել է, որ նախկինում Դիլիջանը` որպես զբոսաշրջային քաղաք, ակտիվության հատուկ շրջաններ ուներ, բայց նման փառատոնների շնորհիվ այն աշխուժացել է, և զբոսաշրջային սեզոնը երակարաձգվել է։

Փառատոնի ընթացքում Հայաստանի բոլոր մարզերին և Արցախին հատկացված առանձին տաղավարները հնարավորություն կտան նաև տեխնիկապես /համակարգիչների, ցուցապաստառների և այլ միջոցներով/ ներկայացնելու տեղի զբոսաշրջային գրավչություններն ու ենթակառուցվածքները։

Հիշեցնենք, որ «ՄԵԴԻԱ ՕՆԻՔՍ»> ընկերությունը, Մշակույթի և տուրիզմի պրոպագանդման հիմնադրամը, ՀՀ տնտեսական զարգացման և ներդրումների նախարարության զբոսաշրջության պետական կոմիտեի և Հայաստանի զբոսաշրջության զարգացման հիմնադրամի աջակցությամբ, սեպտեմբերի 9-ին Դիլիջան քաղաքում կանցկացնի «Մշակութային վերածնունդ» արվեստների և արհեստների hամահայկական փառատոնը։

Փառատոնի գործընկերներն են՝ Հայաստանի Հանրապետության տարածքային կառավարման, ՀՀ մշակույթի, ՀՀ սփյուռքի նախարարությունները, Արցախի Հանրապետության էկոնոմիկայի, ԱՀ մշակույթի նախարարությունները և Դիլիջանի քաղաքապետարանը։