08.12.2025 | 21:00
Վստահ եմ՝ 10-ից բացի մյուս եպիսկոպոսները ևս Կտրիճ Ներսիսյանի դեմ են, շուտով տեսանելի կլինի․ Վահագն Ալեքսանյան․ ՏԵՍԱՆՅՈՒԹ
«Հնչյուն և լռություն. երաժիշտը և նվագարանը դարերի հոլովույթում» խորագրով ցուցադրությունը կամփոփվի գրքի շնորհանդեսով
Մշակույթ
28.08.2017 | 17:32
Ս. թ. օգոստոսի 29-ին, ժամը 17։00-ին, Կոմիտասի թանգարան-ինստիտուտում (հասցե` Արշակունյաց 28) կավարտվի «Հնչյուն և լռություն. երաժիշտը և նվագարանը դարերի հոլովույթում» ժամանակավոր ցուցադրությունը, որի շրջանակում տեղի կունենա գիտական հոդվածների ժողովածուի և ցուցադրության պատկերագրքի շնորհանդեսը։
Ժողովածուն պարունակում է ցուցանմուշների պատկերագիրքը և գիտական հոդվածներ, որտեղ քննարկվում են հայ երաժշտության պատմության մեջ երաժշտին և նվագարաններին առնչվող հիմնախնդիրներ՝ ըստ հնագիտական, մատենագիտական, լեզվաբանական, արվեստաբանական, ազգագրական, մշակութաբանական և այլ աղբյուրների։ Ժողովածուն անդրադառնում է նվագարանների ստեղծման և զարգացման պատմությանը, կենցաղավարմանը, գործառույթներին, մշակութաբանական համատեքստին, լուսաբանում է երաժշտի ու վարպետի դերը պատմության հոլովույթում։
Միջոցառման ընթացքում ելույթ կունենա «KARTASH» duo-ն (Նորայր և Գրիգոր Քարտաշյաններ):
Հիշեցնենք, որ «Հնչյուն և լռություն. երաժիշտը և նվագարանը դարերի հոլովույթում» խորագրով ժամանակավոր ցուցադրությունը Կոմիտասի թանգարան-ինստիտուտում բացվել էր ապրիլի 7-ին:
Ցուցադրությանն իրենց նպաստն էին բերել ՀՀ մշակույթի նախարարությունը, Մայր Աթոռ Սուրբ Էջմիածինը, Հայաստանի պատմության թանգարանը, «Մատենադարան» Մ. Մաշտոցի անվան հին ձեռագրերի գիտահետազոտական ինստիտուտը, Ե. Չարենցի անվան գրականության և արվեստի թանգարանը, Սարդարապատի հերոսամարտի հուշահամալիր. Հայոց ազգագրության և ազատագրական պայքարի պատմության ազգային թանգարանը, Էրեբունի պատմահնագիտական արգելոց-թանգարանը, Էջմիածնի պատմա-ազգագրական թանգարանը, Նոր Ջուղայի Սուրբ Ամենափրկիչ Վանքի Մատենադարանը և այլ մշակութային կազմակերպություններ:
