Քաղաքականություն
21.08.2017 | 18:00ՀԱԿ վարչության անդամ, ազատամարտիկ Վարդան Մալխասյանը Factor.am-ի հետ զրույցում հնարավոր է համարում ընդդիմությանը միավորելու Րաֆֆի Հովհաննիսյանի նախաձեռնության հաջողությունը։ Ըստ նրա՝ ՀԱԿ-ն ահագին ժամանակ վարչության նիստեր չի արել, սակայն եթե «Ժառանգությունը» դիմի իրենց, ՀԱԿ-ը կքննարկի առաջարկը։
ՀԱԿ վարչության անդամ Վարդան Մալխասյանը չի կիսում «Ելք» դաշինքի որոշ անդամների տեսակետը, թե Րաֆֆի Հովհաննիսյանն այլևս քաղաքական դիակ է։ «Ոչ միայն չեմ կիսում, այլ ասում եմ, որ դա հայտարարողներն են քաղաքական դիակ։ Նա, ով որ չի վաճառվել իշխանությանը մինչև այսօր, քաղաքական դիակ չի կարող լինել։ Քաղաքական դիակը նա է, ով որ բարիքը ձեռք բերելու համար ընդունում է ստորությունը, ստորության կանոնները։ Թող գնան, համեմատության մեջ դնեն՝ ովքեր են ավելի շատ վաճառվել այս անազգ, անհայրենիք թափթփուկներին, Րաֆֆի Հովհաննիսյա՞նը, թե՞ իրենք»,- ասաց Մալխասյանը։
Մեր հիշեցմանը, թե իշխանությանը վաճառվելու հետ կապված նաև ՀԱԿ-ի հասցեին են հայտարարություններ հնչել, ՀԱԿ ներկայացուցիչն արձագանքեց․«ՀԱԿ-ը շատ հակառակորդներ ունի։ Իշխանությունը բռնազավթածները ժողովրդից թալանած ահռելի գումարների մի զգալի մասը ծախսել են ՀԱԿ-ը պառակտելու, ջլատելու, ՀԱԿ-ի շուրջ հավաքված մարդկանց կաշառելու վրա»։
Մանրամասները դիտեք Factor.am-ի հետ ՀԱԿ վարչության անդամ, ազատամարտիկ Վարդան Մալխասյանի հարցազրույցում։
Մարինե Խառատյան
