«Արմնյուզ» հեռուստաընկերության տնօրեն է նշանակվել Նարեկ Նիկողոսյանը: Նա նախկինում զբաղեցրել է Սերժ Սարգսյանի մամուլի խոսնակի օգնականի պաշտոնը: Տեղեկությունը մեզ հետ զրույցում հասատտեց նաև Նարեկ Նիկողոսյանը:
Մինչ այդ «Արմնյուզ» հեռուստաընկերության տնօրենը ռեժիսոր Հրաչ Քեշիշյանն էր: Նա, ի դեպ, մի քանի օր առաջ ԱԺ-ում հրաժարվեց պատասխանել «Արմնյուզի» վերաբերյալ լրագրողների հարցերին:
Հիշեցնենք, որ «Արմնյուզ» հեռուստաընկերությունը Tert.am կայքի և «Լավ ռադիո»-ի հետ նախկինում գտնվում էր Սերժ Սարգսյանի փեսայի՝ Միքայել Մինասյանի անվան հետ կապվող «ՊանԱրմենիան» մեդիա գրուպի կազմում, որն արդեն լուծարվել է:
Նշյալ լրատվամիջոցներն այժմ գտնվում են «Քառյակ մեդիա»-ի կազմում, որի սեփականատերերն են ԱԺ ՀՀԿ խմբակցության նախկին պատագամավորներ Արման Սաղաթելյանը, Կարեն Բեքարյանը, Սամվել Ֆարմանյանը և Միհրան Հակոբյանը:
«Արմնյուզի» նոր տնօրենը մեր հարցին ի պատասխան նշեց, որ հեռուստաընկերության ֆորմատը հիմնականում լրատվական է լինելու: Ճշտող հարցին՝ «Արմնյուզը» տեղափոխվե՞լ է արդեն լուծարված «ՊանԱրմենիան» մեդիա հոլդինգի շենքից, Նարեկ Նիկողոսյանն ասաց, որ ընթացքի մեջ է:
«Քառյակ մեդիա»-ի մեր աղբյուրների փոխանցմամբ՝ այս երեք լրատվամիջոցների աշխատակիցները քիչ-քիչ տեղափոխվում են Չարենցի փողոցում գտնվող իրենց նոր գրասենյակ:
Տեղեկացանք, որ այս շաբաթվա սկզբին տեղափոխվել են Tert.am-ի լրագրողները, իսկ մինչև այդ էլ տեխնիկական բաժնի աշխատողներն էին տեղափոխվել:
Հիշեցնենք, որ «Քառյակ մեդիա»-ի տարածած հայտարարության մեջ նշվում էր, որ այս երեք լրատվամիջոցները ներկայանալու են «Թերթ.am» բրենդի ներքո, որը ղեկավարելու է Արամ Անտինյանը, իսկ ռադիոյի ղեկավարումն էլ իրականացնում է Հանրային ռադիոյի նախկին փոխտնօրեն Լիկա Թումանյանը:
Նարեկ Կիրակոսյան
